Көкшетау қаласында орналасқан Қазақстан Республикасының Ұлттық ұланы «Орталық» өңірлік қолбасшылығына қарасты 5510 әскери бөлімінің құрылғанына 30 жыл толуына арналған салтанатты іс-шара ұйымдастырылды, деп хабарлайды DKNews.kz.
Бұл мерейтой – бөлім тарихындағы маңызды кезеңдердің бірі, отыз жыл бойы атқарылған абыройлы қызметтің айқын белгісі.
Шараның ресми бөлімі Мемлекеттік Тудың енгізілуімен басталып, жеке құрам мен қонақтарға бөлімнің тарихы, жетістіктері және әскери қызметшілердің қоғам қауіпсіздігін қамтамасыз етудегі еңбегі туралы арнайы бейнеролик көрсетілді.
Мерейтойға бөлім ардагерлері, офицерлер, сарбаздар және шақырылған қонақтар қатысты.
Салтанатты іс-шара барысында бөлімнің көркемөнерпаздар ұжымы дайындаған мерекелік концерт ұсынылды. Ән мен күй, патриоттық қойылымдар, әскери-патриоттық композициялар жеке құрамға ерекше рух пен серпін берді.
Мерекенің маңызды бөлігі – қызметінде ерекше көзге түскен әскери қызметшілерді марапаттау болды. Бірқатар офицерлер мен сержанттар «Орталық» өңірлік қолбасшылығының қолбасшысы атынан арнайы мадақтамалар алды. Сондай-ақ бөлім командирі атынан да үздік әскери қызметшілер марапатталып, олардың адал еңбегі мен жоғары жауапкершілігі ерекше атап өтілді.
Марапатталғандар Ұлттық ұлан сапында қызмет ету – үлкен мәртебе екенін айтып, командованиеге көрсетілген сенім үшін алғыс білдірді.
5510 әскери бөлімі 30 жыл ішінде қоғамдық қауіпсіздікті қамтамасыз ету, маңызды нысандарды қорғау және құқықтық тәртіпті сақтау бағытында зор нәтижелерге қол жеткізді. Бөлім жеке құрамы бүгінгі таңда да қызметтік міндеттерін жоғары деңгейде орындап, ел қауіпсіздігін нығайтуға өз үлесін қосуда.
Салтанатты кеш бөлімнің даңқты жолын дәріптеп қана қоймай, жас сарбаздар мен офицерлерге патриоттық рух сыйлаған ерекше күн ретінде есте қалды.
