Петропавл қаласында Ұлттық ұланның 6637 әскери бөлімінің әскери жасағы қызметтік бағыт бойынша патрульдеу кезінде төтенше жағдайға тап болды, деп хабарлайды DKNews.kz.
Жасақ бастығы ефрейтор Николай Лисовский, сондай-ақ патруль құрамындағы қатардағы жауынгерлер Дамир Қожахметов пен Виктор Князев тұрғын үйлердің бірінде подъездге жақын терезе жанында ес-түссіз жатқан зейнеткерді байқап қалған.
Ахуалдың қауіптілігін бағамдаған әскери қызметшілер дереу полиция қызметкерлері мен жедел жәрдем бригадасын шақырды. Әскери жасақ бойынша кезекшінің рұқсатын алғаннан кейін ефрейтор Николай Лисовский терезе арқылы пәтерге кірді. Ол зардап шегушінің тамыр соғысын тексерді. Дәрігерлердің жылдам кіріп, көмек көрсетуі үшін ұландықтар ішкі есікті ашып, медициналық қызметкерлердің жұмысын айтарлықтай жеделдетті.
Әскери қызметшілердің жедел әрекеттерінің арқасында зейнеткер дер кезінде дәрігерлердің бақылауына алынып, қажетті медициналық көмекке ие болды.
Бұл оқиға – Ұлттық ұлан әскери қызметшілерінің жоғары жауапкершілігін, кәсібилігін және кез келген жағдайда азаматтарға көмектесуге әрдайым дайын екенін айқын көрсетті.
