ҚР Қарулы күштерінің Ұлттық әскери-патриоттық орталығы мерейтойын атап өтті, деп хабарлайды DKNews.kz.
Астанада ҚР Қарулы күштері Ұлттық әскери-патриоттық орталығының құрылғанына 10 жыл толуына арналған салтанатты жиын өтті.
Орталық ұжымын Қорғаныс министрінің тәрбие және идеологиялық жұмыс жөніндегі орынбасары вице-адмирал Серік Борамбаев, Халық қаһарманы отставкадағы генерал-лейтенант Бақытжан Ертаев, отставкадағы генерал-лейтенант Абай Тасболатов және Қарулы күштердің өзге де ардагерлері құттықтады.
Вице-адмирал Серік Борамбаев ұлттық қауіпсіздіктің негізі өскелең ұрпақты патриоттық рухта тәрбиелеу деп атап өтті. Бүгінде орталық жұмысының ең үздік көрсеткіші – мыңдаған баланың әскери-спорттық іс-шараларға, клубтық жұмысқа және шығармашылық үйірмелерге қатысуы болып отыр.
Сонымен бірге көптеген жасөспірімнің болашақта Отан қорғаушы мамандығын таңдауы да маңызды фактор.
"2025 жылғы 7 қарашада Үкімет қаулысымен Жастарды әскери-патриоттық тәрбиелеудің 2030 жылға дейінгі тұжырымдамасына өзгерістер енгізілді. Аталған құжатта Ұлттық әскери-патриоттық орталық армияның мәдени-рухани негізін қалыптастыратын үйлестіруші орган ретінде белгіленді. Бұл оның мәртебесінің нығайғанын айқын көрсетеді" Қорғаныс министрінің орынбасары
Құттықтаулардан соң идеологиялық және мәдени майданның озаттары медальдармен және грамоталармен марапатталды.
2015 жылдың 1 желтоқсанында Ұлттық әскери-патриоттық орталықтың құрылуы айтарлықтай маңызды оқиға болды. Бұл шешім Қарулы күштердегі патриоттық тәрбие мен мәдени жұмысты сапалық тұрғыдан жаңа деңгейге көтерді. Бүгінде орталыққа музей-тарихи кешен, шығармашылық ұжымдар мен әскери оркестрлер, мәдени-демалыс бөлімдері, мультимедиялық орталық, әдістемелік және ғылыми-талдамалық бөлімдер кіреді.
Бұған дейін бөлімдер мен гарнизондарда жұмыс жүргізілгенімен, ол бірыңғай тұжырымдама мен әдістемелік базаға сүйенбейтін. Бүгінде Алматы, Гвардейск, Семей, Сарыөзек және Қонаев сияқты ірі гарнизондарда орталықтың филиалдары құрылған. Онда әскери оркестрлер, ансамбльдер, музейлер жұмыс істейді. Әскери қызметшілердің балалары үшін үйірмелер ұйымдастырылған.
Салтанатты жиын гарнизондық филиалдардың шығармашылық ұжымдары дайындаған концертпен аяқталды.
