Қазақстан Республикасы Еңбек және халықты әлеуметтік қорғау министрі Светлана Жақыпова 2025 жылғы ведомство жұмысының қорытындысын шығарып, ел азаматтарын Жаңа жылмен құттықтады, сондай-ақ өтіп бара жатқан жыл Мемлекет басшысы мен Үкіметтің тапсырмаларын іске асырудағы жауапты кезең болғанын атап өтті, деп хабарлайды DKNews.kz.
Мемлекеттің әлеуметтік міндеттемелері толық орындалды
Министр өз үндеуінде 2025 жылы мемлекеттің барлық әлеуметтік міндеттемелері уақтылы әрі толық көлемде орындалғанын айтты.
«Бүгінде республикалық бюджет есебінен базалық және ынтымақты зейнетақыларды қоса алғанда, әлеуметтік төлемдердің 41 түрі жүзеге асырылады», — деді Светлана Жақыпова.
Жыл басынан бері 4,6 миллионнан астам адамға, оның ішінде шамамен 2,5 миллион зейнеткер мен 2,1 миллион мемлекеттік жәрдемақы алушыға зейнетақы мен жәрдемақы төлеуге 5,9 трлн теңгеге жуық қаражат бағытталды.
Зейнетақы жүйесі және азаматтардың табысын арттыру
Мемлекет басшысының тапсырмасына сәйкес 2025 жылғы 1 қаңтардан бастап базалық зейнетақының ең төменгі мөлшері ең төменгі күнкөріс деңгейінің 70 пайызына, ал ең жоғарысы 110 пайызына дейін артты.
Министр сондай-ақ жұмыс берушілердің міндетті зейнетақы жарналарының мөлшерлемесі кезең-кезеңімен ұлғайтылып, 2028 жылға қарай 5 пайызға жететінін, ал бүгінде жинақтаушы зейнетақы жүйесіне жұмыспен қамтылғандардың 65 пайызы қатысатынын еске салды.
Жұмыспен қамту және кәсіпкерлік бастамаларды қолдау
Жұмыспен қамтуға жәрдемдесу шараларын іске асыру нәтижесінде еңбек нарығына шамамен 300 мың жас маман шыққанына қарамастан жұмыссыздық деңгейі 4,6 пайызға дейін төмендеді.
«Жыл басынан бері 820 мыңнан астам адам жұмысқа орналастырылды», — деді Жақыпова.
Жұмыспен қамтудың белсенді шараларымен 296 мың адам қамтылды, оның ішінде әлеуметтік осал санаттағы 9 239 азамат жаңа бизнес-бастамаларды іске қосу үшін 400 АЕК-ке дейінгі грант алды.
Оқыту және кәсіби бағдар беру бағдарламаларымен 478 мыңнан астам қазақстандық қамтылды.
Жұмыс берушілердің жауапкершілігі және еңбек құқықтарын қорғау
2025 жылы субсидияланатын жұмыс орындарын ұйымдастыру кезінде жұмыс берушілердің жауапкершілігін күшейтетін нормативтік құқықтық актілерге өзгерістер қабылданды.
Мемлекеттік еңбек инспекторлары 55,1 мыңнан астам жұмыскердің құқықтарын қорғап, 10,1 мың азамат алдындағы 2,2 млрд теңге жалақы қарызы өтелді
Жұмыс берушілерге 3 781 нұсқама беріліп, салынған айыппұлдар көлемі 470,7 млн теңгеден асты.
Біліктілік, еңбекті қорғау және жарақаттануды азайту
Ұлттық біліктілік жүйесін дамыту аясында 2025 жылы 1,1 мыңнан астам кәсіпті қамтитын, оның ішінде 600-і жұмысшы мамандықтар болатын 132 кәсіби стандарт әзірленіп, өзектендірілді.
Еңбекті қорғау шараларының арқасында өндірістік жарақаттану деңгейі 6,5 пайызға, ал өлім-жітім 4,5 пайызға төмендеді.
Мүгедектігі бар адамдарды қолдау және қызметтерді цифрландыру
Министр 50-ден астам нозология бойынша мүгедектікті проактивті форматта белгілеу кеңінен дамып жатқанын атап өтті
Осы форматта елдің барлық өңірінен келіп түскен 99,6 мыңға жуық өтінім қаралды.
Ағзаның қайтымсыз өзгерістері кезінде мүгедектікті жеңілдетілген тәртіппен белгілеу бойынша пилоттық жоба іске асырылуда, онда мерзімдер бір жұмыс күніне дейін қысқартылды.
Әлеуметтік қызметтер порталы арқылы 522 мыңнан астам адам көмек алды, инватакси қызметін 27 мың азамат пайдаланды.
Әлеуметтік қызметтер, балаларды оңалту және қолжетімді орта
2025 жылғы 1 қаңтардан бастап арнайы әлеуметтік қызметтер көрсететін орталықтарды лицензиялау енгізіліп, жан басына шаққандағы қаржыландыру мен цифрландыруға көшу жүзеге асырылды.
582 лицензия берілді, қызметтерді 94 мыңнан астам адам алуда.
Үйде балаларды оңалту жобасы да табысты іске асырылуда, оған 489 бала қатысып, олардың 353-інде қимыл-қозғалыс дамуының айқын жақсаруы байқалды
Ел бойынша 24 мыңнан астам нысан бейімделді.
Көші-қон саясаты және әлеуметтік қолдауды цифрлық трансформациялау
2025 жылы еңбек көші-қонын реттеуге, шетелдегі қазақстандықтардың құқықтарын қорғауға және білікті мамандарды тартуға бағытталған 2030 жылға дейінгі көші-қон саясатының жаңа тәсілдері әзірленді.
Сонымен қатар әлеуметтік қызметтердің бірыңғай цифрлық платформасын енгізу жүргізілуде, бұл санаттық қағидаттан мұқтаждық критерийлеріне көшуге және көмектің атаулылығын арттыруға мүмкіндік береді.
Жаңа жылдық құттықтау және тілектер
Сөз соңында Светлана Жақыпова азаматтарды келе жатқан Жаңа жылмен құттықтады.
«2026 жыл халықтың өмір сүру сапасының артуы, отбасы мен рухани құндылықтардың нығаюы белгісімен өтсін деп шын жүректен тілеймін
Ол еліміз үшін ізгілік пен жасампаздық жылы болсын».
Министр барлық қазақстандықтарға зор денсаулық, амандық, бақыт және әр шаңырақта өзара түсіністік тіледі.
