Сауда және интеграция министрі Арман Шаққалиев 1 қаңтар күні елордадағы ірі сауда желілерін аралап шықты. Ол Small, Magnum және «Анвар» дүкендеріне барып, мерекеден кейінгі бағалар мен тауардың бар-жоғын тексерді, деп хабарлайды DKNews.kz.
Бүгін дүкендер сағат 10:00-де ашылды. Министр алғашқы келушілердің бірі болып, бірнеше маңызды мәселеге назар аударды: бағалардың тұрақтылығы, сөрелердің толымдылығы және ассортимент.
Министр не деді
Арман Шаққалиевтің айтуынша, жағдай тұрақты.
«Біз сауда желілерін арнайы 1 қаңтарда тексердік. Басты мақсатымыз - бүгінгі күні бағалардың тұрақты екеніне көз жеткізу. Ешқандай өзгеріс те, тапшылық та жоқ. Жаңа жыл қарсаңында біз сауда желілерімен бірге “Береке fest” акциясын өткіздік. Дүкендер әлі де жеңілдіктер ұсынып отыр. Сөрелер тауарға толы. Осындай тұрақты жағдай барлық сауда нысандарында болуы тиіс», - деді министр.
Дүкендерден не талап етіледі
Сауда желілері өкілдерімен кездесуде министр мынаны атап өтті:
- бағаларды тұрақты ұстау маңызды
- негізсіз қымбаттатуға жол бермеу керек
- әлеуметтік маңызы бар тауарларға сауда үстемесіне бақылау жүйелі түрде жүргізіледі
Бұл - ең алдымен отбасылар мен зейнеткерлер жиі сатып алатын өнімдер.
Мониторинг бүкіл елде жүргізілуде
Министрдің тапсырмасы бойынша мұндай тексерулер тек астанада ғана емес, өңірлерде де өтіп жатыр. Сауда және тұтынушылардың құқықтарын қорғау департаменттері жергілікті әкімдіктермен бірлесіп мониторинг жүргізуде.
Соңғы алты апта ішінде әлеуметтік маңызы бар азық-түлік бағасы тұрақты болып тұр.
