Қазақстанда 2026 жылдан бастап салық заңнамасына енгізілетін өзгерістер көпшіліктің сұрағын көбейтті. Пәтер сату, оңайлатылған декларация және ҚҚС бойынша тіркеу — көпшілікті толғандыратын негізгі тақырыптар, деп хабарлайды DKNews.kz.
Маңғыстау облысы бойынша Мемлекеттік кірістер департаменті осы сұрақтарға жауап берді. Біз ең бастыларын қысқаша түсіндіріп шықтық.
Сұрақ 1. Пәтерді бір жылдан кейін сатсам, салық төлене ме?
Жағдай: пәтер 2025 жылы сатып алынды және тіркелді. Сату – тура бір жылдан кейін.
Жауап: құн өсімінен табыс салығы туындамайды.
Неге?
- егер жылжымайтын мүлік 2025 жылы сатып алынса және тіркелсе,
- және мемлекеттік тіркелген күннен бастап бір жыл немесе одан да көп уақыт өткеннен кейін сатылса,
онда құн өсімінен табыс есептелмейді.
Ал өзгерістер кімге қатысты?
2026 жылғы 1 қаңтардан кейін тіркелетін жылжымайтын мүлікке.
Мұндай жағдайда: меншік иелену мерзімі – екі жыл болып есептеледі.
Сұрақ 2. Біздің ЭҚЖЖ тізімде жоқ. Оңайлатылған декларацияны қолдана аламыз ба?
Жауап: иә, егер талаптар сақталса — қолдануға болады.
Оңайлатылған декларация негізіндегі арнаулы салық режимін:
- Қазақстан Республикасының резидент-заңды тұлғалары,
- дара кәсіпкерлер
қолдана алады, егер олардың қызмет түрі:
2025 жылғы 14 қарашадағы № 970 Үкімет қаулысындағы тыйым салынған тізімге енгізілмесе.
Яғни:
- егер сіздің қызмет түріңіз тізімде жоқ болса,
- және режимді қолдану талаптары сақталса
— оңайлатылған декларациямен жұмыс істеуге құқығыңыз бар.
Сұрақ 3. 2026 жылы ҚҚС бойынша тіркеу шегі қандай?
Қосылған құн салығы бойынша тіркеу есебіне қою шегі: 10 000 АЕК
Қолданыстағы АЕК: 4 325 теңге.
Сонда: 43 250 000 теңге
Егер айналым осы сомадан асып кетсе — ҚҚС бойынша тіркеу міндетті.
Бастысы — мерзім мен шектерді бақылау
- 2025 жылы тіркелген пәтерді бір жылдан кейін сатқанда — салық туындамайды
- ЭҚЖЖ тізімде жоқ болса — оңайлатылған декларацияны қолдануға болады
- ҚҚС бойынша шек — 43,25 млн теңге
