Президент, Қазақстан Республикасы Қарулы Күштерінің Жоғарғы Бас қолбасшысы Қасым-Жомарт Тоқаев Қорғаныс министрі Дәурен Қосановты қабылдады. Кездесу барысында Мемлекет басшысына қорғаныс ведомствосының 2025 жылы атқарған қызметінің қорытындылары ұсынылды, деп хабарлайды DKNews.kz.
Президентке армияның жауынгерлік әзірлік деңгейі, сондай-ақ Қарулы күштерді дамытудың негізгі басым бағыттары туралы жан-жақты ақпарат берілді. Баяндамада әскери басқару жүйесін жетілдіру, бөлімшелердің дайындығын арттыру және қазіргі заман талаптарына сай армия қалыптастыру мәселелері қамтылды.
Дәурен Қосанов қорғаныс саласында цифрлық технологияларды енгізу жұмыстарының барысына тоқталды. Оның айтуынша, басқару процестерін цифрландыру армияның тиімділігін арттырып, жедел шешім қабылдау мүмкіндігін кеңейтуде. Сонымен бірге әскери-патриоттық тәрбие беру бағытындағы жұмыстардың маңыздылығы атап өтілді. Бұл шаралар әскери қызметшілердің кәсіби даярлығын нығайтып, әскер қатарындағы жауапкершілікті күшейтуге бағытталған.
Кездесу барысында қорғаныс инфрақұрылымын жетілдіру мәселелері де сөз болды. Әскери нысандарды жаңғырту, оқу-жаттығу базаларын дамыту және әскери қызметшілердің қызмет ету жағдайларын жақсарту жөніндегі шаралар Мемлекет басшысына таныстырылды.
Сонымен қатар Президенттің Қарулы күштер сапында тәртіп орнату жөніндегі тапсырмаларының орындалу барысы туралы жеке ақпарат берілді. Бұл бағытта әскердегі әскери және құқықтық тәртіпті күшейтуге бағытталған бірқатар нақты қадамдар жүзеге асырылып жатқаны айтылды.
Кездесу қорытындысы бойынша Қасым-Жомарт Тоқаев Қорғаныс министріне армияның жауынгерлік әзірлік деңгейін одан әрі арттыру, әскери және құқықтық тәртіпті күшейту, сондай-ақ Қарулы күштердің тұрақты дайындығын қамтамасыз ету жөнінде нақты міндеттер жүктеді.
Мемлекет басшысы елдің қорғаныс қабілетін нығайту және әскердегі тәртіп мәселелері әрдайым ерекше бақылауда болатынын атап өтті.
