Астанада Мемлекеттік кеңесші Ерлан Кариннің төрағалығымен Парламенттік реформа жөніндегі Жұмыс тобының бесінші отырысы өтті, деп хабарлайды DKNews.kz.
Отырыс барысында қатысушылар жаңа Парламенттің негізгі мемлекеттік институттардың қызметін қамтамасыз етудегі рөлі мен өкілеттіктерін, сондай-ақ конституциялық және парламенттік реформаны одан әрі дамытуға қатысты келіп түскен ұсыныстарды талқылады.
Азаматтар мен сарапшылардан шамамен 600 ұсыныс түсті
Парламентаризм институтының директоры Наталья Пан азаматтар, сарапшылар және қоғамдық белсенділерден түскен ұсыныстар жөнінде жинақталған ақпаратты ұсынды. Оның айтуынша, өткен жылдың қазан айынан бері e-Otinish және eGov платформаларындағы «Парламенттік реформа» арнайы бөлімі арқылы шамамен 600 ұсыныс келіп түскен.
Талқылауға саяси партиялар мен қоғамдық бірлестіктердің өкілдері белсенді қатысты. Олардың қатарында «Байтақ» партиясы, сыбайлас жемқорлыққа қарсы жалпыұлттық «Жаңару» қозғалысы, Республикалық адвокаттар алқасы, «TOQTAMYS» адвокаттық қауымдастығы, Халықаралық арбитраж және медиация палатасы, Парламентаризмді дамыту қоры, Қазақстан татарлары мен башқұрттары конгресі, Экономикалық саясат институты, «Азаматтық бастама» бастамашыл тобы және басқа да ұйымдар бар. Сондай-ақ сараптамалық ұсынымдар жолдаған заңгер-ғалымдар да елеулі үлес қосты.
Ұсыныстар парламенттік реформамен шектелмейді
Наталья Панның айтуынша, азаматтар мен қоғамдық бірлестіктерден парламенттік реформаға қатысты бастамалармен қатар конституциялық реформа жөнінде де ұсыныстар түсіп отыр. Бұл саяси жүйені трансформациялауға деген қоғамдық қызығушылықтың жоғары екенін көрсетеді.
Биліктің негізгі органдарын қалыптастырудағы Парламенттің рөлі
Жұмыс тобы басшысының орынбасары, Президенттің құқықтық мәселелер жөніндегі көмекшісі Ержан Жиенбаев Парламенттің Үкіметті, Конституциялық сотты, Жоғары аудиторлық палатаны, Орталық сайлау комиссиясын және басқа да мемлекеттік органдарды қалыптастыруға қатысуының конституциялық рәсімдеріне қатысты жалпы тәсілдерді баяндады. Бұл тәсілдер Жұмыс тобы мүшелері мен саяси партиялардың ұсыныстары негізінде әзірленген.
Кең ауқымды сараптамалық талқылау
Отырыс барысында Жұмыс тобының мүшелері — Марат Шибутов, Азат Перуашев, Елнур Бейсенбаев, Серік Егизбаев, Магеррам Магеррамов, Айдарбек Ходжаназаров, Марат Башимов, Нұрлан Бекназаров, Индира Аубакирова, Үнзила Шапақ, Алуа Ибраева, Бурихан Нұрмұхамедов, Лейла Жақаева, Виктор Малиновский, Ерлан Сәрсембаев, Айдос Сарым және Қарлығаш Жаманкулова өз идеялары мен ұсыныстарын ортаға салды.
Отырыс қорытындысы бойынша берілген тапсырмалар
Талқылау қорытындысы бойынша Ерлан Карин конституциялық реформаға қатысты түпкілікті тәсілдерді қалыптастыру және парламенттік жүйені одан әрі жетілдіру үшін барлық келіп түскен ұсыныстарды жинақтап, талдауды тапсырды.
Парламенттік реформа жөніндегі Жұмыс тобы Мемлекет басшысының өкімімен 2025 жылғы 8 қазанда құрылған.
Алғашқы отырыс 14 қазанда, екіншісі — 2 желтоқсанда, үшіншісі — 2025 жылғы 29 желтоқсанда өтті. Төртінші отырыс 2026 жылғы 9 қаңтарда, бесінші отырыс 2026 жылғы қаңтар айында Астанада өтті.
