1 қаңтардан бастап Қазақстанда салмағы 12 тоннадан асатын самосвалдар мен ауыр жүк көліктерінің жалпы пайдаланымдағы автомобиль жолдарымен қозғалуына қойылған тыйым алынып тасталды. Бұл шешім Құрылыс кодексінің күшіне енуі және заңнамаға енгізілген түзетулермен байланысты, деп хабарлайды DKNews.kz.
Бұған дейін бұл норма бизнес үшін үлкен тәуекел ретінде қарастырылған еді.
Қандай тыйым жоспарланған еді
Еске салсақ, бастапқыда 1 қаңтардан бастап рұқсат етілген ең жоғары массадан асатын жүк көліктерінің қозғалысына тыйым салу көзделген. Мұндай шектеу «Автомобиль жолдары туралы» заңның 38-2-бабында қарастырылған болатын.
Бұл талап күшіне енсе, құрылыс, ауыл шаруашылығы және өнеркәсіп салаларындағы жүк тасымалы айтарлықтай қиындайтыны айтылған.
Бизнес неге алаңдады
Шығыс Қазақстан облысының Кәсіпкерлер палатасында бұл мәселе бірнеше рет көтерілді. Кәсіпкерлердің айтуынша, ауыр жүк көліктеріне тыйым салу құрылыс нысандарының, инфрақұрылымдық жобалардың және ауыл шаруашылығы жұмыстарының тоқтап қалуына әкелуі мүмкін еді.
Логистика шығындарының өсуі де негізгі қауіптердің бірі ретінде аталды.
Нормалар қайта қаралды
Құрылыс кодексінің жобасы мен «Сәулет, қала құрылысы және құрылыс саласындағы кейбір заңнамалық актілерге өзгерістер мен толықтырулар енгізу туралы» заң аясында бұл талаптар қайта қаралды.
Нәтижесінде ауыр жүк көліктерінің қозғалысына тыйым салатын ережелер заңнамадан алынып тасталды.
Не ресми түрде өзгерді
ШҚО бойынша Көліктік бақылау инспекциясының мәліметінше, қабылданған өзгерістерге сәйкес «Автомобиль жолдары туралы» заңның 23-2 және 38-2-баптары күшін жойды. Тыйымды алып тастау 1 қаңтардан бастап ресми түрде қолданысқа енгізілді.
«Белгіленген салмақтық және габариттік параметрлер сақталған жағдайда самосвалдар мен ауыр жүк көліктері жалпы пайдаланымдағы автомобиль жолдарымен еркін қозғала алады. Бұл көлік түрімен жүк тасымалдауға қатысты қосымша шектеулер жоқ», – деп хабарлады ведомствода.
Бақылау сақталады
Сонымен қатар уәкілетті органдар осьтік жүктемелер мен көлік құралдарының техникалық талаптарын бақылау жалғасатынын атап өтті. Ауыр жүк көліктерінің иелері мен операторларына қолданыстағы нормаларды қатаң сақтау ұсынылады.
Бұл талаптарды бұзу әкімшілік жауапкершілікке әкелуі мүмкін.
Өзгерістер не үшін қажет болды
Шығыс Қазақстан облысы Кәсіпкерлер палатасы директорының құқықтық мәселелер жөніндегі орынбасары Айжан Жангирханованың айтуынша, қабылданған өзгерістер кәсіпкерлік қызметті қолдауға бағытталған.
Оның сөзінше, бұл шешім инфрақұрылымдық және құрылыс жобаларын кедергісіз іске асыруға, сондай-ақ бизнес үшін әкімшілік тосқауылдарды азайтуға мүмкіндік береді.
