Сүт безі қатерлі ісігі әйелдер арасында ең кең таралған онкологиялық ауру болып қала береді. Қазақстанда жыл сайын 40-42 мыңға жуық қатерлі ісік жағдайы анықталады, ал бұл диагноз әйелдер онкологиясының құрылымында бірінші орында тұр, деп хабарлайды DKNews.kz.
Бірақ бұл тек статистика емес. Әрбір санның артында — нақты адам, оның қорқынышы, үміті және өмірін өзгерткен шешімі бар. Осы материалда баяндалатын пациенттің тарихы — саналы таңдау мен отандық денсаулық сақтау жүйесіне деген сенімнің айқын мысалы.
Диагноздан шешімге дейінгі жол
Диагноз күтпеген жерден қойылды және эмоционалдық тұрғыдан өте ауыр болды. Онкологиямен бетпе-бет келген көптеген адамдар сияқты, әйел де алғашында емделу мүмкіндіктерін шетелден іздей бастады. Клиникаларды, елдерді, технологияларды, емдеу тәсілдерін салыстырды.
«Бір сәтте түсіндім: клиниканың атағы немесе қай елде орналасқаны шешуші фактор емес екен. Ең бастысы — дәрігерлердің кәсібилігі, заманауи жабдықтарға қолжетімділік және нақты, түсінікті емдеу жоспары», — дейді ол.
Осы түсінік оның Қазақстанда қалу және емді осында жалғастыру туралы шешім қабылдауына негіз болды.
Қазіргі онкология — бұл жеке дәрігер емес, тұтас жүйе
Бүгінде Қазақстандағы онкологиялық көмек бірізді әрі жүйелі түрде құрылған. Ол ерте анықтау мен скринингтік бағдарламалардан басталып, мамандандырылған емдеумен жалғасады және оңалту мен кейінгі бақылаумен аяқталады.
Емдеу барысында:
- ағзаны сақтайтын операциялар,
- аз инвазивті және роботтандырылған технологиялар,
- сәулелік терапияның заманауи әдістері,
- медициналық және функционалдық оңалту бағдарламалары қолданылады.
Науқаспен бір ғана дәрігер емес, пәнаралық команда жұмыс істейді. Консилиумдар өткізіліп, әрбір жағдай жеке қаралады, ал кейінгі бақылау тіркелген жері бойынша жалғасады.
Нәтижеге бағытталған технологиялар
Емдеу сапасын арттыруда онкологиялық ұйымдардың материалдық-техникалық базасын жаңғырту шешуші рөл атқарды. «Қазақстан халқына» қоғамдық қорының стратегиялық әрі уақтылы қолдауының арқасында бірқатар орталықтарда сәулелік терапияға арналған жоғары дәлдікті заманауи жабдықтар орнатылды.
Бұл қадам отандық онкологияны әлемнің жетекші клиникалары деңгейіне жақындатты және ең бастысы — жоғары технологиялық көмекті ел ішінде қолжетімді етті.
Қазіргі сәулелік терапия аппараттары:
- сәулелену дозасын барынша дәл жеткізуге,
- сау тіндерге түсетін жүктемені азайтуға,
- аралас және ағзаны сақтайтын емдеу тәсілдерін кеңейтуге,
- емнің көтерімділігін және өмір сапасын жақсартуға мүмкіндік береді.
Сандардың артындағы жүйелі еңбек
Онкологиялық қызметтегі өзгерістер статистикада да көрініс табуда. Соңғы бес жылда Қазақстанда онкологиялық аурулардан болатын өлім-жітім шамамен 20%-ға төмендеді.
Бұл — скрининг бағдарламаларын кеңейту, ерте диагностика, заманауи емдеу әдістерін енгізу, жабдықтарды жаңарту және медициналық кадрларды жүйелі даярлау нәтижесі.
Үйден алыстамай-ақ, сапалы ем алу
Бұл пациенттің тарихы — ерекше жағдай емес. Ол бүгінгі таңда Қазақстанда сапалы онкологиялық көмектің шетелге шықпай-ақ қолжетімді екенін көрсетеді.
Заманауи технологиялар, білікті мамандар мен мемлекеттік қолдау сүт безі қатерлі ісігін халықаралық стандарттар деңгейінде емдеуге мүмкіндік беріп отыр — отбасынан, үйінен алыс кетпей-ақ.
Бұл материал ақпараттық-ағартушылық мақсатта дайындалды. Ол әйелдерге үміт беріп қана қоймай, ерте диагностика мен дұрыс таңдалған емнің өмірді сақтап қалатынын еске салуды көздейді.
