Құтқарушылар халықаралық автобустың 46 жолаушысын эвакуациялады, деп хабарлайды DKNews.kz.
Бүгін Ақтөбе облысы Әйтеке би ауданында республикалық маңызы бар «Қостанай – Рудный – Денисовка – Комсомольское – Қарабұтақ» автожолының 89-шақырымында құтқарушылардың жергілікті атқарушы органдармен бірлескен күшімен техникалық ақауы бар автобустың жолаушыларын эвакуациялау жұмыстары жүргізілді.
Автобус Екатеринбург – Худжанд бағытымен жүріп келе жатқан, алайда техникалық себептерге байланысты қозғалысын жалғастыра алмады.
Құтқарушылардың жедел әрекеттерінің нәтижесінде 46 адам, оның ішінде Ресей Федерациясының, Өзбекстан Республикасының, Тәжікстан Республикасының азаматтары, сондай-ақ Қазақстан Республикасының азаматы болып табылатын жүргізуші эвакуацияланып, Т. Жүргенов атындағы ауылдағы жылыту пунктіне жеткізілді.
Зардап шеккендер жоқ. Эвакуацияланғандардың барлығына қажетті көмек көрсетілді.
