Астанада интернет арқылы алаяқтық жасап, бірнеше миллион теңге табыс табуды көздеген 20 жастағы қала тұрғынына сот үкімі шықты. Жас жігіт танысу қосымшаларын пайдаланып, жәбірленушінің сеніміне кіріп, ірі көлемде ақша алған, деп хабарлайды DKNews.kz.
Алаяқ Tinder қосымшасына әйел адамның атымен - «Нұрай» деген атпен тіркеліп, анкетаға Telegram-дағы аккаунтына сілтеме қалдырған. Осылайша ол танысуды басқа платформаға көшіріп, бақылаудан тыс сөйлесуге мүмкіндік алған.
Telegram-дағы жалған бейне және уәде етілген кездесу
Telegram желісінде ол бейтаныс қыздың суретін пайдаланып, жалған парақша ашқан. «Нұрай» атынан жәбірленушімен күнделікті сөйлесіп, сеніміне кірген соң, әртүрлі сылтаулармен ақша сұрай бастаған.
Әрбір қаржылық өтініш жеке кездесуге уәде берумен жалғасқан. Алайда бұл кездесулер ешқашан болмаған.
Жәбірленуші алаяқтықты сезбей, үш айға жетпейтін уақыт ішінде 4 млн теңгеден астам қаржысын аударған.
Сот қандай шешім шығарды
Сот айыпталушыны ақпараттық жүйе пайдаланушысына қатысты ірі көлемде жасалған алаяқтық үшін кінәлі деп таныды.
Үкім шығару барысында сот бірқатар жеңілдететін мән-жайларды ескерді. Атап айтқанда, айыпталушы жасаған ісіне шын жүректен өкінген, келтірілген материалдық залалды өз еркімен өтеген және істі ауырлататын мән-жайлар анықталмаған.
Осының негізінде сот оған 3 жыл мерзімге бас бостандығын шектеу жазасын тағайындап, пробациялық бақылау белгіледі.
Интернеттегі сенім – үлкен тәуекел
Бұл оқиға интернеттегі таныстықтың артында қандай қауіп жасырынуы мүмкін екенін тағы бір рет көрсетті. Қазіргі таңда алаяқтар танысу қосымшаларын, әлеуметтік желілер мен мессенджерлерді жиі пайдаланып, адамдардың эмоциясына әсер ету арқылы ақша алуға тырысады.
Мамандар виртуалды таныстардың ақша сұрауы – алаяқтықтың ең алғашқы белгісі екенін ескертеді. Тіпті әңгіме сенімді көрінсе де, кездесу уәде етілсе де, жеке таныспайынша қаржы аудармауға кеңес береді.
Интернеттегі бір сәттік сенім кейде миллиондаған шығын мен ұзақ сот процесіне алып келуі мүмкін.
