Қаңтар ҰБТ нәтижесіне көңілі толмаған талапкерлер үшін мамыр – екінші әрі нақты мүмкіндік. Білім беру сарапшыларының айтуынша, қаңтар мен мамыр арасындағы төрт айды дұрыс жоспарлаған оқушылар өз нәтижесін 20–30 ұпайға, ал кей жағдайда одан да жоғары көтере алады, деп хабарлайды DKNews.kz.
Қаңтар ҰБТ: биылғы статистика не дейді?
2026 жылдың 10 қаңтарында басталған Қаңтар ҰБТ 10 ақпанға дейін жалғасады. Биыл тестілеуге 187 мыңға жуық адам өтініш берген. Бұл өткен жылмен салыстырғанда 20 мыңға көп.
Ұлттық тестілеу орталығының мәліметінше:
- талапкерлердің 75,2%-ы тестілеуді қазақ тілінде,
- 24,6%-ы орыс тілінде,
- 189 адам ағылшын тілінде тапсыруды таңдаған.
ҚР Ғылым және жоғары білім министрлігі хабарлағандай, 2026 жылы ҰБТ форматы өзгеріссіз қалды: үш міндетті пән және таңдауы бойынша екі бейіндік пән.
Маңыздысы – Қаңтар ҰБТ-дан кейін Ұлттық тестілеу орталығы талапкерлерге толық аналитикалық есеп ұсынады. Дәл осы деректерді дұрыс түсіну әрі талдау – мамырға дейінгі дайындықтың басты кілті.
«Қаңтар ҰБТ – бұл диагностика. Нәтижені дұрыс талдап, әр тапсырманың логикасын түсінген оқушы мамырға дейін айтарлықтай өсім көрсете алады», – дейді JUZ40 білім беру орталығының математикалық сауаттылық пәні бойынша жетекші мұғалімі Дулат Мұратов.
Айта кетейік, Дулат Мұратов ҰБТ саласында 4 жылдық тәжірибесі бар, осы уақыт ішінде 10 мыңға жуық оқушының грантқа түсуіне көмектескен.
1-қадам. Қатемен жүйелі жұмыс – негіз қалаушы кезең
Дайындықтың ең алғашқы әрі маңызды кезеңі – қатемен дұрыс жұмыс жасау. Бұл жерде тек дұрыс пен қатені санап шығу жеткіліксіз.
Сарапшылар бұл кезеңге:
- 5 күн уақыт бөлуді,
- күніне 2,5–3 сағат дайындық жасауды ұсынады.
Алғашқы күні барлық пән бойынша тест нәтижелері жиналып, қате кеткен сұрақтар жеке іріктеледі. Келесі күндері сол тақырыптар қайта қаралып, ұқсас тапсырмалар қайта орындалады. Мақсат – қателіктің себебін түсіну.
2-қадам. 4 айлық нақты жоспар
Төрт айлық дайындықты кезең-кезеңімен жүргізу тиімді:
1-ай – базалық теория. Барлық пән бойынша негізгі тақырыптар жүйелі түрде оқылады.
2-ай – теория + практика. Тақырыптарды қайталау және сол бөлімдерге арналған тесттерді орындау.
3-ай – әлсіз тұстарды күшейту. Қатемен терең жұмыс және уақытты басқару дағдысын қалыптастыру.
4-ай – толық қайталау мен сынақ тесттері. ҰБТ форматына толық бейімделу.
Күніне 4–6 сағат дайындық ең тиімді нәтиже береді. Әр 60–90 минут сайын қысқа үзіліс жасау ұсынылады.
3-қадам. Қай тақырыптарда қате көп кетеді?
Өткен жылғы тәжірибе көрсеткендей, кей пәндерде оқушылар жиі байқамай ұпай жоғалтады. Мәселен, оқу сауаттылығы пәнінде қиындық мәтін көлемінде емес, сұрақтың қойылуында.
Ең жиі қателер:
- астарлы мағынасы бар сұрақтар,
- автор көзқарасын анықтау,
- «ең дәл қорытындыны таңдаңыз» типіндегі тапсырмалар.
Көп жағдайда оқушылар мәтінге емес, өз пікіріне сүйеніп жауап береді немесе асығыстық танытады.
4-қадам. Сынақ тесттері – сенімділіктің кілті
Сынақ тесттері:
- білім деңгейін,
- уақытты басқаруды,
- психологиялық дайындықты тексеруге көмектеседі.
Қашан бастау керек? Дайындықтың алғашқы айының соңында.
Қаншалықты жиі?
- алғашқы екі айда – аптасына 1 рет,
- үшінші айда – аптасына 2 рет,
- соңғы айда – аптасына 3–4 рет.
Қайда тапсыру керек? ҰБТ форматына ең жақын ресми платформалар:
- prob-ent.testcenter.kz
- app.testcenter.kz
Нәтиже бар екенін дәлелдейтін мысалдар
JUZ40 білім беру орталығының дерегінше, қаңтар ҰБТ-дан кейін қатемен талдауға негізделген дайындықтан өткен оқушылардың 90%-ы мамырда нәтижесін 20–30 ұпайға жақсартқан.
Мысалы:
- 2024 жылы Еңсебек Жаннұр қаңтарда 121 балл жинап, мамырда 140 балл иегері атанды;
- 2025 жылы Серік Ермухаммед қаңтардағы 79 баллдан мамырда 125 баллға дейін көтеріліп, +46 ұпай көрсетті.
Қаңтар – соңғы нүкте емес
Мамандар қаңтар ҰБТ-ны сәтсіздік емес, дайындықтың маңызды кезеңі деп қарауға шақырады. Дұрыс стратегия, жүйелі еңбек және сенім болса, мамырдағы нәтиже айтарлықтай жоғары болуы әбден мүмкін.
Бұл тест – мүмкіндік. Әр қателік – тәжірибе. Әр нәтиже – алға жасалған қадам. Барлық талапкерлерге сәттілік!
