2025 жылдың қорытындысы бойынша Еуразиялық банктің қаржы нәтижесі жоспарланған бірқатар шығындар мен активтердің аздап қысқаруы аясында қалыптасты. Соған қарамастан банк капиталының жеткіліктілігі жоғары деңгейде қалып, реттеуші талаптарынан айтарлықтай асып түсті, деп хабарлайды DKNews.kz.
Банкте атап өткендей, таза пайданың төмендеуі операциялық қызметтің әлсіреуінен емес, жыл соңында бір мезетте көрсетілген стратегиялық және реттеуші шешімдерге байланысты шығындармен түсіндіріледі.
Пайда неге азайды
2025 жылдың соңында банк бірқатар алдын ала жоспарланған бір реттік шығындарды қаржылық есептілікте көрсетті. Бұл шығындар ұзақ мерзімді тұрақтылықты қамтамасыз етуге бағытталған шешімдердің бір бөлігі болды.
Атап айтқанда, шығындар құрылымында:
- 30 млрд теңге көлеміндегі мемлекеттік қолдауды мерзімінен бұрын ішінара өтеуге байланысты дисконттың төмендеуі;
- бұрын салық салудан босатылған операциялар бойынша корпоративтік табыс салығын қайта есептеу;
- Өзбекстан Республикасындағы еншілес банк қызметінің аяқталуына байланысты шығындар қамтылды.
Осы факторлардың бір кезеңде шоғырлануы таза пайданың төмендеуіне әсер етті.
Несие тәуекелдері бақылауда
Макроэкономикалық жағдайдың күрделі болуына қарамастан, банк несие портфелінің сапасын бақылауда ұстап отыр. 2025 жылы клиенттерді кредиттеу кезіндегі тәуекелдерді жабуға жұмсалған таза шығындар 73 млрд теңгені құрады. Бұл көрсеткіш 2024 жылмен салыстырғанда небәрі 1 млрд теңгеге ғана өскен.
Проблемалық несиелердің үлесі (NPL) 3,8%-дан төмен деңгейде сақталды, бұл тәуекелдердің басқарылатынын көрсетеді.
Негізгі көрсеткіштер
Есептік күндегі жағдай бойынша:
- банк активтері - 3 026 млрд теңге;
- таза пайда - 16,4 млрд теңге;
- реттеуші меншікті капитал - 503 млрд теңге;
- бірінші деңгейдегі капитал жеткіліктілігі - 19%;
- екінші деңгейдегі капитал жеткіліктілігі - 24,9%.
Бұл көрсеткіштердің барлығы реттеуші талаптарынан едәуір жоғары, яғни банк айтарлықтай қауіпсіздік қорын сақтап отыр.
Басымдық - ұзақ мерзімді тұрақтылық
Еуразиялық банк Басқармасының Төрағасы Ләззат Сатиева есептік жылдың нәтижесіне әсер еткен барлық шығындар алдын ала жоспарланғанын атап өтті.
Оның айтуынша, банк 2025 жылы қысқа мерзімді нәтижеден гөрі ұзақ мерзімді тұрақтылыққа басымдық берді:
Өткен жыл бизнес үшін оңай болған жоқ, бірақ стратегиялық және басқарушылық міндеттер тұрғысынан мазмұнды әрі қызықты өтті. Банк бірегей өнімдерді іске қосып, құрылымдық дамуға бағытталған шешімдерді дәйекті түрде жүзеге асырды.
Сатиева Ләззаттың айтуынша, Еуразиялық банк Жаңа жылға тұрақты операциялық базамен, қалыпты жұмыс істейтін жүйемен және әрі қарай дамудың айқын басымдықтарымен қадам басты.
Нарық үшін нені білдіреді
2025 жылғы нәтижелер Еуразиялық банктің тактикалық емес, стратегиялық таңдаулар жасағанын көрсетеді. Пайда көрсеткішінің төмендеуі - уақытша фактор, ал жоғары капитал жеткіліктілігі мен бақыланатын тәуекелдер банктің келесі кезеңге сенімді өтуіне мүмкіндік береді.
Бұл тәсіл банк секторындағы ұзақ мерзімді тұрақтылыққа мән берудің күшейіп келе жатқанын көрсететін белгі ретінде бағаланады.
