Атырау облысында елдегі ең ірі мұнай кен орындарында өндіруді қалпына келтіру бағытында маңызды ілгерілеу бар, деп хабарлайды DKNews.kz.
Екінші буын зауыты мен Королевское кен орны іске қосылды, ал Теңіз кен орны жақын күндері қайта өндіруге дайындалып жатыр.
Энергетика министрлігінің мәліметінше, негізгі кезеңдердің бірі — 26 қаңтарда Екінші буын зауытының сәтті іске қосылуы болды. Қазіргі уақытта кәсіпорын 4:00-де жұмысын бастаған Королевское кен орнынан жеткізілетін шикізат есебінен жұмыс істеп тұр. Зауытқа түсіп жатқан шикізат ағыны тәулігіне шамамен 2 500 тоннаны құрайды.
Мамандар жүйені толтыру және жобалық қуаттарға шығу үшін көпфазалы ағынды — мұнай мен газды — кезең-кезеңімен арттыруда. Жұмыстар барлық технологиялық талаптарды сақтай отырып, жоспарлы режимде жүргізілуде.
Теңіздегі толық жұмылдыру
Теңіз кен орнында персонал мен техникалық ресурстардың толық жұмылдырылуы жарияланды. Қазіргі уақытта энергетикалық нысандар мен электр энергиясын тарату жүйелеріне кешенді тексерулер жүргізіліп жатыр. Алынған деректерге сәйкес, финалдық техникалық сынақтарға қажетті барлық мамандар тартылған.
Қазіргі сәтте энергиямен жабдықтау жүйесінің қауіпсіз іске қосылғаны расталды, бұл өндіруді жақын арада қайта бастауға мүмкіндік беріп отыр. «Теңізшевройл» компаниясына өндірістік процесті барынша жедел қалпына келтіру міндеті қойылды, бұл ретте өнеркәсіптік қауіпсіздік пен еңбекті қорғау талаптарын қатаң сақтау басты назарда.
Негізгі күн — 2 ақпан
Екінші буын зауытының іске қосылуы арнайы технологиялық қосқышты (перемычка) жедел орнатудың арқасында мүмкін болды. Келесі маңызды кезең — 2 ақпан. Осы күні компрессор мен төрт трансформаторды пайдалана отырып, қысымды арттыру жүйелері арқылы жұмысты қайта бастау жоспарланған.
Бұл Технологиялық желілер кешені мен Екінші буын зауытына шикізатты тұрақты әрі толық көлемде жеткізуді қамтамасыз етіп, орнықты өндірістік көрсеткіштерге шығу үшін шешуші мәнге ие.
Тәулік бойғы бақылау
Энергетика министрлігі мен «ҚазМұнайГаз» «Теңізшевройл» компаниясына техникалық іс-шараларды үйлестіруде жан-жақты қолдау көрсетіп, жағдайды сағат сайын бақылап отыр.
Тікелей жедел бақылау үшін министрлік пен ұлттық компанияның басшылығы кен орнында тұрақты түрде жұмыс істеуде. Оқиға орнындағы бақылауды энергетика вице-министрі Қайырхан Тұтқышбаев пен «ҚазМұнайГаздың» ірі мұнай-газ жобалары департаментінің директоры Жандос Жылқайдаров жүзеге асырып отыр.
Энергетика министрлігінде толық өндірістік циклді қалпына келтіру мәселесі ерекше әрі тұрақты бақылауда екенін атап өтті. «Теңізшевройл» компаниясы инфрақұрылымның дайындығына және барлық технологиялық процестердің қауіпсіздігі расталғанына қарай мұнай өндіру көлемін кезең-кезеңімен арттыруды жоспарлап отыр.
