Қазақстан өнеркәсібі сыртқы серіктестермен жаңа кезеңге қадам басып келеді. Бұл жолы әңгіме тек қаржы тарту емес, жоғары қосылған құн, экспорт және нақты өндірістік өсім туралы болды. ҚР Өнеркәсіп және құрылыс министрі Ерсайын Нағаспаев Еуропалық қайта құру және даму банкінің Орталық Азия және Моңғолия бойынша басқарушы директоры Хусейн Озханмен кездесу өткізді, деп хабарлайды DKNews.kz.
Күн тәртібінде – 2026 жыл
Кездесу барысында тараптар ЕҚДБ-ның 2025 жылғы Қазақстандағы жұмыс қорытындыларын және 2026 жылға арналған ынтымақтастық жоспарларын талқылады. Негізгі назар өнеркәсіптік дамудың басым бағыттарына, әсіресе өңдеу секторына аударылды.
Сөз жоғары қосылған құн қалыптастыратын жобалар туралы өрбіді. Бұл – шикізатқа тәуелділікті азайтып, дайын өнім экспортына бет бұрудың басты шарты.
160 жоба және 8,8 трлн теңге
Министрдің айтуынша, Қазақстан ЕҚДБ-ны ұзақ мерзімді әрі сенімді серіктес ретінде қарастырады.
«Біз ЕҚДБ-ны бірлескен жобалар үшін сенімді серіктес ретінде көреміз және өңдеу өнеркәсібінің басым салаларында, жалпы құны 8,8 трлн теңгеден асатын шамамен 160 жоба аясында ынтымақтастықты кеңейтуді ұсынамыз», – деді Ерсайын Нағаспаев.
Бұл жобалар өндірісті жаңғыртуға, технологиялық тізбектерді тереңдетуге және экспортқа бағытталған жергіліктілендіруді күшейтуге мүмкіндік береді.
Қаржыландырудың жаңа тәсілдері
Кездесуде өнеркәсіп секторын қаржыландыру тетіктері де жеке талқыланды. Әңгіме дәстүрлі несиелеумен шектелмей, икемді құралдар мен ұзақ мерзімді инвестициялық шешімдер туралы болды. Бұл, әсіресе, ірі өндірістік жобалар үшін маңызды.
Өсу бар, жоспар бар
Қазақстан өнеркәсібі соңғы жылдары тұрақты өсім көрсетіп келеді. 2025 жылы өндіріс көлемі 6,4 пайызға артты. Ал 2026 жылға арналған болжам – 6,2 пайыздық өсім.
Бұл көрсеткіштер өңдеу өнеркәсібіне жасалып жатқан басымдықтың және халықаралық қаржы институттарымен жүйелі жұмыстың нәтижесі ретінде қарастырылады.
Не өзгереді?
Мұндай кездесулердің басты мәні – цифр мен мәлімдемеде емес. Нақты өндіріс, жаңа зауыттар, экспортқа шығатын өнім және технологиялық серпін – негізгі мақсат осы. Егер жоспарланған жобалар толық іске асса, Қазақстан өнеркәсібі үшін 2026 жыл тек өсу жылы емес, сапалық өзгерістер кезеңі болмақ.
