Әл-Фараби атындағы Қазақ ұлттық университетінің ғалымдары қалалық ортаның тазалығын қамтамасыз етуге бағытталған «Taza Qala» цифрлық платформасын әзірледі. Жаңа жоба қаладағы тазалыққа қатысты мәселелерді жинақтап, жүйелеуге және оларға жедел әрекет етуге мүмкіндік береді, деп хабарлайды DKNews.kz.
Платформа қандай мәселені шешеді
Қалаларда заңсыз қоқыс үйінділері мен тазалыққа қатысты шағымдар жиі кездеседі. «Taza Qala» бұл мәселелерді тіркеумен ғана шектелмей, нақты нәтиже көрсетуге бағытталған. Платформа арқылы жауапты қызметтердің жұмысы үйлестіріліп, қабылданған шаралардың нәтижесі қоғамға ашық ұсынылады.
Платформа қалай жұмыс істейді
Жобаның басты ерекшелігі – қала тұрғындарының тікелей қатысуы. Әрбір азамат экологиялық мәселеге өзі сигнал беріп, оның қалай шешілгенін бақылай алады.
Жұмыс тәртібі мынадай:
-
тұрғын заңсыз қоқыс орнын немесе қоқыс үйіндісін суретке түсіреді
-
сурет платформаға жүктеледі
-
жасанды интеллект қоқыстың көлемін автоматты түрде анықтайды
-
ақпарат тиісті қоқыс жинаушы компанияға жіберіледі
-
тазалау аяқталғаннан кейін атқарылған жұмыс жөніндегі есеп платформада жарияланады
Қажет болған жағдайда қалалық табиғатты қорғау прокуратурасы мен әкімшілік мамандары қосымша тексеріс жүргізе алады.
Жобаның авторы
Платформаны ақпараттық технологиялар және жасанды интеллект факультетінің 2-курс магистранты Нұрлыхан Қалжанов әзірлеген. Оның айтуынша, басты мақсат – тұрғындардың өтініштері назардан тыс қалмауы.
«Маңыздысы – мәселені тіркеу ғана емес, оның нақты шешілгенін көру. Пайдаланушы қай жерде қандай шара қабылданғанын біле алады», – дейді ол.
Қалай пайдалануға болады
«Taza Qala» платформасы қазірдің өзінде толыққанды жұмыс істеп тұр. Қала тұрғындары оған:
- кез келген танымал браузер арқылы «Taza Qala» деп іздеу жүйесіне жазу
- QR-кодты пайдалану арқылы кіру
Алдағы уақытта платформаны одан әрі ыңғайлы ету үшін арнайы мобильді қосымша әзірлеу жоспарланған.
Ұлттық экологиялық бастамамен үндес
Ақпараттық технологиялар және жасанды интеллект факультетінің деканы Тимур Иманқұловтың айтуынша, жоба Мемлекет басшысы Қасым-Жомарт Тоқаевтың «Таза Қазақстан» экологиялық акциясымен тікелей үндеседі.
«Мұндай цифрлық платформа Қазақстанда алғаш рет іске асырылып отыр. Болашақта оны еліміздің барлық өңірін қамтитындай кеңейту көзделген», – дейді ол.
Қаланың қолдауы бар
Университет ғалымдары әзірлеген цифрлық платформаны әкімшілік мамандарына таныстырды. Жоба қалалық әкімдік тарапынан қолдау тауып, оны практикалық деңгейде енгізуге мүмкіндік берді.
