2026 жылғы 4–7 ақпан аралығында Қатар астанасы Доха қаласында Қазақстан Республикасының мәдениет күндері өтеді. Іс-шара Мемлекет басшысы Қасым-Жомарт Тоқаевтың Қатар Мемлекетіне жасаған мемлекеттік сапары барысында қол жеткізілген уағдаластықтар аясында ұйымдастырылады, деп хабарлайды DKNews.kz.
Мәдени бағдарлама Қазақстан мен Қатар арасындағы мәдени-гуманитарлық ынтымақтастықты нығайтуға және қазақстандық ұлттық мәдениетті халықаралық деңгейде кеңінен танытуға бағытталған.
Негізгі алаң және бағдарлама
Мәдениет күндерінің басты іс-шаралары Доха қаласындағы «Дарб Аль-Саги» мәдени-тарихи орталығында өтеді. Бағдарлама гала-концерттерді, тақырыптық концерттерді, көрмелер мен ағартушылық бағыттағы кездесулерді қамтиды.
Көрермен назарына Қазақстанның дәстүрлі және заманауи өнері ұсынылады. Атап айтқанда, ұлттық музыка мен хореография, қолданбалы және бейнелеу өнері, сахналық мәдениет элементтері мен ұлттық киім үлгілері таныстырылады.
Гала-концерт және белгілі өнерпаздар
Мәдениет күндері аясындағы алғашқы ірі іс-шара 4 ақпан күні өтетін гала-концерт болмақ. Онда Құрманғазы атындағы Қазақ ұлттық консерваториясының қазақ халық аспаптары оркестрі мен «Бірлік» би ансамблі өнер көрсетеді.
Концертке Қазақстанның халық әртісі Әлішер Кәрімов, Қазақстанның еңбек сіңірген қайраткерлері Медет Шотабаев, Зарина Алтынбаева және Мария Мудряк, сондай-ақ «Дарын» мемлекеттік жастар сыйлығының лауреаттары Асқар Мұқият, Рухия Байдүкенова, Расул Жармағамбетов, Назым Сағынтай және өзге де танымал өнер өкілдері қатысады.
Бағдарламада қазақ халқының классикалық музыкалық мұралары, халық әндері мен күйлері, сондай-ақ симфониялық өңдеудегі заманауи шығармалар орындалады.
Этно-фольклорлық кеш
6 ақпан күні «Joshy» этно-фольклорлық ансамблінің жеке концерті жоспарланған. Ұжым халық әндері мен күйлерін дәстүрлі музыкалық аспаптарда, сонымен қатар заманауи өңдеуде орындайды.
Дәстүр, өнер және шеберлік
Мәдениет күндері барысында ұлттық дәстүрлерді, халықтық өнер мен спорт түрлерін насихаттауға ерекше көңіл бөлінеді. Іс-шараларға Қазақстанның белгілі мәдениет және өнер қайраткерлері, шығармашылық ұжымдар, дәстүрлі өнер шеберлері, қолөнершілер мен аспаздар қатысады.
Көрермендер үшін ұлттық мәдени мұраны тереңірек таныстыруға бағытталған таныстырылымдар мен шеберлік сабақтары ұйымдастырылады. Бұл кездесулер қазақстандық өнер мен мәдениеттің мазмұнын кең аудиторияға ашып көрсетуге мүмкіндік береді.
