Қазақстанда әлеуметтік маңызы бар азық-түлік тауарларының бағасын тұрақтандыру және сауда үстемесінің сақталуын қамтамасыз ету бағытындағы жұмыстар жалғасып жатыр. Осы мақсатта кәсіпкерлік субъектілерімен түсіндіру және алдын алу шаралары жүйелі түрде жүргізілуде, деп хабарлайды DKNews.kz.
2025 жылғы 23 желтоқсанда Сауда және интеграция министрінің № 362-нқ бұйрығымен әлеуметтік маңызы бар азық-түлік тауарларының кеңейтілген тізбесі бекітілді. Нәтижесінде ӘМАТ атауларының саны 19-дан 31-ге дейін артты. Аталған тауарлар бағасына жергілікті атқарушы органдар тарапынан күшейтілген бақылау мен тұрақты мониторинг енгізілді.
Баға қайда және қалай бақыланады
Баға мониторингі күнделікті тұтыну орындарында жүргізіледі. Атап айтқанда:
- «үй жанындағы» шағын дүкендерде;
- азық-түлік базарларында;
- сауда желілерінде.
Басты талап — әлеуметтік маңызы бар азық-түлік тауарларына белгіленген шекті сауда үстемесінің 15 пайыздан аспауын қамтамасыз ету және бағаның негізсіз өсуіне жол бермеу.
Кәсіпкерлермен түсіндіру жұмысы
Кәсіпкерлік субъектілерімен жұмыс аясында заңнама талаптары жан-жақты түсіндіріліп, консультациялар өткізіледі және ақпараттық материалдар таратылады. Бұл шаралар бизнес өкілдеріне талаптарды алдын ала түсіндіріп, заң бұзушылықтардың алдын алуға бағытталған.
Жауапкершілік қандай
Егер заң бұзушылықтар анықталса, Әкімшілік құқық бұзушылық туралы кодекстің 204-4-бабына сәйкес жауапкершілік көзделген. Айыппұл мөлшері кәсіпкерлік субъектісінің санатына байланысты белгіленеді:
- жеке тұлғалар мен шағын кәсіпкерлік субъектілері үшін — 5 АЕК;
- орта кәсіпкерлік субъектілері үшін — 35 АЕК;
- ірі кәсіпкерлік субъектілері үшін — 150 АЕК.
Әкімшілік жаза қолданылғаннан кейін бір жыл ішінде құқық бұзушылық қайта жасалса, айыппұл екі еселенеді.
Бақылау жалғасады
Әлеуметтік маңызы бар азық-түлік тауарларына белгіленген сауда үстемесінің сақталуын бақылау және бағаға мониторинг жүргізу жұмыстары алдағы уақытта да тұрақты негізде жалғасатын болады. Бұл шаралар халық үшін негізгі азық-түлік бағасының қолжетімділігін қамтамасыз етуге бағытталған.
