Қыс мінезін тағы бір рет көрсетті. Бүгін Жамбыл облысы аумағында қарлы боран салдарынан жолда қалған жолаушыларға құтқарушылар жедел көмек көрсетті, деп хабарлайды DKNews.kz.
Оқиға Жуалы ауданы арқылы өтетін облыстық маңызы бар Б. Момышұлы – Көлтоған тас жолының 38-шақырымында болған.
Қатты жел мен қалың қар жол қозғалысын күрделендіріп, бірнеше көлік қар құрсауында қалып қойған. Дәл осындай сәтте уақытпен санаспай әрекет ететін ТЖМ қызметкерлері шұғыл түрде авариялық-құтқару жұмыстарына кірісті.
Құтқарушылардың жедел әрекетінің арқасында қарға көміліп қалған 4 автокөлік қауіпсіз жерге шығарылды. Көліктердің ішінде 8 адам, оның ішінде 1 бала болған. Абырой болғанда, ешкім медициналық көмекке мұқтаж болмады.
ТЖМ
Құтқарушылар адамдарды жылытып, жағдайларын тексеріп шыққаннан кейін, жүргізушілер жолдарын жалғастырды. Бұл — қысқы жолда сақтықтың қаншалықты маңызды екенін тағы бір еске салатын жағдай.
Мамандар мұндай ауа райында алыс жолға шығарда:
- ауа райы болжамын тексеруге,
- көлікті қысқа дайындауға,
- жылы киім мен байланыс құралдарын алып жүруге,
- мүмкін болса, жабық жолдарға шықпауға кеңес береді.
Қарлы боран — тосын мінезді. Бірақ дер кезінде жеткен құтқарушылардың көмегі талай жанды қиын жағдайдан аман алып шығып жатыр. Осындай сәттерде олардың еңбегі ерекше сезіледі.
