Талдықорған қаласында «Жол бер!» республикалық профилактикалық акциясы аясында Қазақстанның Төтенше жағдайлар министрлігі әлеуметтік эксперимент өткізді. Құтқарушылар қала көшелеріне шығып, жүргізушілердің өрт сөндіру көліктерінің дабылына қалай әрекет ететінін және арнайы көліктерге уақытында жол беруге дайын екенін байқады, деп хабарлайды DKNews.kz.
Іс-шараның басты мақсаты – жол қозғалысына қатысушылардың жедел қызметтерге деген жауапкершілігін арттыру және жол мәдениетін қалыптастыру.
Диалог форматы таңдалды
Эксперимент барысында құтқарушылар жүргізушілермен тікелей диалог орнатты. Оларға арнайы көліктерге жол берудің маңызы, әрбір секундтың адам өмірін сақтаудағы рөлі туралы сұрақтар қойылды.
Жүргізушілермен әңгімеге блогер Эмин Хаджиев те қосылып, жолдағы тәртіп пен жедел қызметтердің оқиға орнына дер кезінде жетуінің маңызын түсіндіруге атсалысты.
Жүргізушілер не дейді
Әңгіме барысында қатысушылар өз пікірлері мен жеке тәжірибелерімен бөлісті. Көптеген жүргізушілер арнайы көліктердің дабылын естіген сәтте жол беруге тырысатынын айтты.
Олардың сөзінше, мұндай әрекет кей жағдайда біреудің өмірін сақтап қалуға тікелей әсер етуі мүмкін, сондықтан бұл – әр жүргізушінің азаматтық жауапкершілігі.
Әр секунд маңызды
ТЖМ қызметкерлері «Жол бер!» акциясының мәніне ерекше тоқталды. Құтқарушылардың айтуынша, өрт сөндіру, жедел жәрдем немесе басқа да арнайы қызмет көліктерінің кідірісі ауыр салдарға әкелуі мүмкін.
Сондықтан жолдағы өзара құрмет пен тәртіп – қауіпсіздіктің негізгі кепілі.
Профилактика жалғасады
ТЖМ өкілдері мұндай акциялар елдің өзге өңірлерінде де жалғасатынын атап өтті. Әлеуметтік эксперименттер арқылы жүргізушілердің назарын нақты өмірлік жағдайлар арқылы аудару тиімді тәсіл ретінде бағаланып отыр.
