Ақпанның ортасында Қазақстанда ауа райы күрт құбылады. Астанада аяз -28 градусқа дейін күшейсе, Алматыда қар мен жаңбыр араласып, көктайғақ болады, ал Шымкентте күн бірден +15 градусқа дейін жылынып, көктем лебі сезіледі, деп хабарлайды DKNews.kz. 13-15 ақпан аралығында ел тұрғындарын қандай ауа райы күтіп тұр?
Астана - сақылдаған аяз
Елордада нағыз қыс қаһарына мінеді.
13 ақпанда түнде ауа температурасы -26-28 градусқа дейін төмендейді, күндіз -12-14 градус болады. Жауын-шашын күтілмейді, алайда оңтүстік-шығыстан соққан жел суықты күшейте түседі.
14 ақпанда аздап жылынады - түнде -21-23, күндіз -9-11 градус.
15 ақпанда аяз біршама бәсеңдейді - түнде -20-22, күндіз -5-7 градусқа дейін көтеріледі.
Жауын-шашын болмайды, бірақ мұндай суықта әлсіз желдің өзі қатты сезіледі. Сондықтан елорда тұрғындары барынша жылы киініп, үсік шалу қаупін ескергені жөн.
Алматы - қар, тұман және көктайғақ
Оңтүстік астанада ауа райы құбылмалы болады.
13 ақпанда құбылмалы бұлтты, кей уақытта қар жауып, тұман түседі, көктайғақ байқалады. Түнде -4-6, күндіз 0-ден +2 градусқа дейін.
14 ақпанда таңертең және күндіз жауын-шашын - жаңбыр мен қар күтіледі. Кей уақытта тұман түсіп, жолдарда көктайғақ болады. Түнде -1-3, күндіз +1+3 градус.
15 ақпанда түнде қар жауып, күндіз ауа температурасы +3+5 градусқа дейін көтеріледі. Жолдарда көктайғақ сақталады.
Көлік жүргізушілері аса мұқият болғаны абзал - ауыспалы температура мен жауын-шашын жол жағдайын күрделендіреді.
Шымкент - көктем лебі
Аяз қысып тұрған солтүстікпен салыстырғанда, Шымкентте ауа райы әлдеқайда жылы болады.
13 ақпанда кей уақытта жауын-шашын, көбіне жаңбыр, тұман және көктайғақ күтіледі. Түнде +2+4, күндіз +7+9 градус.
14 ақпанда бұлтты, түнде жауын-шашын, күндіз жаңбыр жауады. Жел екпіні секундына 15 метрге дейін жетуі мүмкін. Күндіз +8+10 градус.
15 ақпанда күндізгі температура +13+15 градусқа дейін көтеріледі.
Дегенмен шығыстан соғатын жел екпінді болып, кей уақытта жауын-шашын мен тұман сақталады. Жолдар дымқыл әрі тайғақ болуы мүмкін.
Ақпан айы Қазақстанда тағы да өз мінезін көрсетуде. Солтүстікте - қақаған аяз, оңтүстікте - көктемге тән жылылық, ал Алматы қыс пен жылымықтың тоғысқан тұсында тұр. Мұндай ауа райында денсаулыққа да, жол қауіпсіздігіне де ерекше назар аудару қажет.
Көктем әлі толық келген жоқ, бірақ Шымкентте оның алғашқы белгілері сезіле бастады.
