Қазақстан Республикасының Премьер-министрі Олжас Бектенов Астана қаласына жұмыс сапары барысында шағын және орта бизнес жобаларын, сондай-ақ заманауи спорттық инфрақұрылымды дамыту барысын тексерді. Жұмыстар Мемлекет басшысының тұрақты экономикалық өсімді қамтамасыз ету және бұқаралық спортты дамыту жөніндегі тапсырмаларына сәйкес жүргізілуде, деп хабарлайды DKNews.kz.
ШОБ экономиканың негізгі қозғаушы күшіне айналды
Сапар барысында Премьер-министр «Тәп-тәтті» ЖШС-нің дайын тағам және жартылай фабрикаттар шығаратын зауытының өндірістік қуатымен танысты. Кәсіпорын жылына 5 мың тоннаға дейін өнім шығаруға қауқарлы, заманауи жабдықтармен қамтамасыз етілген және 200 адамды тұрақты жұмыспен қамтып отыр.
Қазіргі таңда елімізде ШОБ саласында шамамен 4,5 млн адам еңбек етеді. Астанада 273 мыңнан астам кәсіпкерлік субъектісі жұмыс істейді, секторда 557 мыңнан астам адам еңбек етуде және оның қала экономикасындағы үлесі 74,4%-ға жетіп, республика бойынша ең жоғары көрсеткішке айналған.
Кәсіпкерлерді қолдау шаралары кеңейтілуде
Үкімет «Іскер Аймақ» бағдарламасын жүзеге асырып, бизнес-қоғамдастықпен бірлесіп қосымша қаржылық және реттеу шараларын пысықтауда. «Бәйтерек» холдингі өндірістерді жеңілдікпен қайта жарақтандыру бағдарламасын іске қосқан. Сонымен қатар жаңа Салық кодексі кәсіпкерлер ұсыныстарын ескере отырып, жұмсақ форматта енгізіліп келеді.
2025 жылы Астанада кәсіпкерлерді қолдауға жергілікті бюджеттен 12,8 млрд теңге бөлініп, мыңдаған жоба субсидияланып, ондаған кәсіпкерге кепілдік пен грант берілді.
Елордада жаңа шаңғы базасы ашылды
Премьер-министр Астана қаласының орталық саябағында салынған жаңа шаңғы базасын да аралады. Екі қабатты кешеннің жалпы аумағы шамамен 2 мың шаршы метрді құрайды және бір ауысымда 300 адамға дейін қабылдай алады. Нысанның құрылысы 2025 жылдың сәуірінде басталып, 2026 жылдың қаңтарында аяқталған, 30 жұмыс орны ашылған.
Базада заманауи жаттығу залы, кәсіби тренажерлер, соның ішінде жыл бойы жаттығуға мүмкіндік беретін «Skate Treadmill RL3500E» инновациялық құрылғысы орнатылған. Сонымен қатар шаңғы жабдықтарын дайындау, сақтау және кептіруге арналған арнайы үй-жайлар қарастырылған.
База олимпиадалық резервті даярлаудың негізгі алаңы болады
Жаңа спорт кешені балалар мен жасөспірімдер спорт мектептері, олимпиадалық резерв орталығы және жоғары спорт шеберлігі мектебі тәрбиеленушілерін даярлаудың басты алаңына айналады. Алғашқы кезеңде 15 жаттықтырушының жетекшілігімен шамамен 180 спортшы жаттығып, кейін бұл көрсеткішті 360 адамға дейін арттыру жоспарланған.
Шаңғы жарыстарымен қатар биатлон және спорттық бағдарлау бағыттары да дамытылады, ал қала тұрғындары үшін бұқаралық спортпен айналысуға қолайлы жағдай жасалады.
Бұқаралық спорт көрсеткіштері өсіп келеді
Республика бойынша спорт инфрақұрылымы жүйелі түрде кеңейіп келеді. Соның нәтижесінде халықтың спорт нысандарымен қамтылу деңгейі 2023 жылғы 52,2%-дан 2025 жылы 59,6%-ға дейін артты, ал спортпен тұрақты айналысатын азаматтардың үлесі 40,4%-дан 44,5%-ға жетті.
Премьер-министр тапсырма берді
Олжас Бектенов сапар барысында бұқаралық спорт пен олимпиадалық резервті қолдаудың маңызын атап өтті.
«Мемлекет басшысы бұқаралық спортты дамытуға, салауатты ұрпақты тәрбиелеуге және жалпы ұлт денсаулығын нығайтуға ерекше назар аударады. Заманауи спорт инфрақұрылымы мен қол жетімді әрі сапалы база қалыптастырмай, мұны істеу мүмкін емес. Мұндай нысандардың құрылысы спортшыларды жүйелі даярлау және жастарымыздың әлеуетін ашу үшін негіз болмақ. Қазір Италияда Олимпиада ойындары өтіп жатыр және біз спортшыларымыздың жеңіске жетуі үшін жағдай жасаудың қаншалықты маңызды екенін көріп отырмыз, сондықтан мемлекет біздің спортшыларымызға ең жоғары деңгейде жаттығуға мүмкіндік беретін инфрақұрылымды дәйекті түрде дайындауда. Бұқаралық спорт пен олимпиадалық резервті қолдау – бұл ұлт денсаулығына және елдің халықаралық имиджіне салынған инвестиция», — деп атап өтті Премьер-министр.
Жұмыс сапарының қорытындысы бойынша салалық министрліктер мен қала әкімдігіне олимпиадалық резерв инфрақұрылымын дамыту, жастарды бұқаралық спортқа тарту бағдарламаларын кеңейту және ШОБ-ты жүйелі қолдауды жалғастыру тапсырылды.
