2026 жылғы 18 ақпанда сағат 15:00-де Алматыдағы Ықылас атындағы халық музыкалық аспаптар музейінде «Димаш: бір дауыс – мың ел» атты көрменің салтанатты ашылуы өтеді. Экспозиция Қазақстанның Халық әртісі, әлемге танылған вокалист Димаш Құдайбергеннің жеке қорындағы музыкалық аспаптарға арналған, деп хабарлайды DKNews.kz.
Көрменің негізгі мақсаты
Ұйымдастырушылардың мәліметінше, көрме:
- өнер арқылы халықтарды жақындастыру
- мемлекеттер арасындағы мәдени байланыстарды нығайту
- жанкүйерлерге әншінің шығармашылық жолын тереңірек таныстыру
мақсатында ұйымдастырылып отыр.
Экспозиция Димаштың халықаралық жетістіктерін көрсетуге және ұлттық музыкалық аспаптардың мәдени маңызын кеңінен насихаттауға бағытталған.
70-тен астам бірегей жәдігер қойылады
Көрмеге әншінің жеке қорынан 70-тен астам ерекше жәдігер ұсынылады. Олардың қатарында:
- 2011–2012 жылдары Халықаралық 30/31 ғарыш экспедициясы кезінде ғарышта болған саха халқының дәстүрлі чөмчөө уус аспабы
- Майкл Джексонның жеке стилисі Гоко Залди әзірлеген сахналық костюм
- румындық виртуоз Георге Замфир сыйлаған пан-флейта
- атасының отбасылық мұрасы – баян
бар.
Бұл жәдігерлер Димаштың шығармашылық жолын, сондай-ақ түрлі халықтардың мәдени байланысын айшықтайды.
Домбыра музей қорына тапсырылады
Іс-шара соңында Димаш Құдайберген бала күнінен пайдаланған жеке домбырасын Ықылас атындағы халық музыкалық аспаптар музейінің қорына салтанатты түрде табыстайды.
Өтетін орны мен уақыты
- Өтетін орны: Алматы қаласы, Зенков көшесі, 24а
- Күні мен уақыты: 2026 жылғы 18 ақпан, сағат 15:00
