Ақынға шабыт әртүрлі жағдайда келеді. Бірі оны махаббаттан іздесе, енді бірі табиғаттың тылсымынан табады.
Ал 25 жастағы Ерік Ысқақ үшін шынайы шығармашылық серпіліс әскери сапта, сап түзеген сарбаздардың арасында оянды, деп хабарлайды DKNews.kz.
Тараз қаласындағы Ұлттық ұланның 5513 әскери бөлімінде Отан алдындағы борышын өтеп жүрген жас сарбаздың қойын дәптері соңғы айларда өлеңге толды. Бұрын лирикалық бағытқа жақын болған жас ақын енді патриоттық жанрға қалам тербей бастады. Оның айтуынша, әскери орта – ерлік пен жауапкершіліктің нағыз мектебі.
Әкеден дарыған өнер
«Әке көрген – оқ жонар» демекші, Ерікке ақындық қанмен келген. Оның әкесі – Ескермес Сәрсембаев, Қазақстан Жазушылар одағының мүшесі, белгілі ақын-жазушы.
Бала күнінен өлең ортасында өскен Ерік сөз құдіретін ерте түсінді. Бірақ ол өзін тек әдебиетпен шектемеді. Өнердің тағы бір қырын – зергерлікті таңдады. Алматыдағы Орал Таңсықбаев атындағы сәндік-қолданбалы өнер колледжі қабырғасында қолөнерді меңгеріп, ұлттық нақыштағы бұйымдар жасауды үйренді.
Яғни, оның бойында атадан қалған қос өнер – сөз бен шеберлік қатар өрілді.
Шабыт әскери сапта келген сәт
Көпшілік әскерді қатаң тәртіппен ғана байланыстырады. Алайда Ерік үшін бұл орта – ішкі серпілістің бастауы болды.
Ұлттық ұлан сапында жүргенде ол «ерлік», «батырлық», «Антқа адалдық», «патриоттық сезім» деген ұғымдардың шынайы мәнін түсінгенін айтады. Күнделікті қоғамдық тәртіпті қамтамасыз етіп, тұрғындардың тыныштығын күзете жүріп, сарбаздардың қарапайым, бірақ маңызды ерліктеріне куә болды.
Сол әсерлер оның шығармашылығына жаңа тыныс ашты. Бұрын жат көрінген патриоттық жанр енді жүрекке жақын тақырыпқа айналды.
«Өлең – ішкі сезімнің айнасы. Әскери өмір мені өзгертті. Бұл жерде әр күн – жауапкершілік. Әр күн – Отан алдындағы парыз», – дейді жас сарбаз.
Тараз – тарих пен шабыт тоғысқан мекен
Екі мың жылдық тарихы бар Тараз – тек көне шаһар ғана емес, рухани тереңдіктің ордасы. Осындай тарихи қалада қызмет ету Ерікке ерекше әсер еткен.
Көне көшелер мен тарихи тыныс, әскери сап пен тәртіп – осының бәрі оның поэзиясында жаңа образдар тудырды. Ол әр ұландықтың күнделікті қызметін өлең жолдары арқылы дәріптеуді мақсат етті.
Қойын дәптеріндегі жаңа туындыларында сарбаздың ішкі толғанысы, саптағы достық, түнгі күзеттегі ойлар, антына адал болу секілді тақырыптар көрініс табады.
Ұлттық ұлан – таланттар ордасы
Көп жағдайда әскери қызмет тек міндет ретінде қабылданады. Бірақ шын мәнінде бұл – адамның жаңа қырларын ашатын кезең.
Ұлттық ұлан сапында әр сарбаз тек Отан қорғап қана қоймай, өз қабілетін шыңдай алады. Бірі спортта, бірі музыкада, енді бірі әдебиетте биікке ұмтылады. Ерік Ысқақ соның жарқын мысалы.
Ол мерзімді әскери қызметті уақыт жоғалту емес, керісінше, өзін табудың мүмкіндігі деп санайды.
Жас ақынның жаңа белесі
Әскерге келгенге дейін Ерік өзін ақын ретінде қалыптасып үлгерді деуге болмайды. Бірақ дәл осы орта оның бойындағы талантты шыңдап, жаңа бағытқа бұрды.
Бүгінде ол болашақта патриоттық тақырыптағы жинақ шығаруды армандайды. Әскери өмірден алған әсерін, сарбаз достарының бейнесін, Отанға деген сүйіспеншілікті жыр жолдарына айналдыру – оның басты мақсаты.
Шабыт кейде күтпеген жерден келеді. Ерік Ысқақ үшін ол сап түзеген сарбаздардың қатарында, әскери анттың салмағын сезінген сәтте оянды.
Ал бұл – жас ақынның үлкен жолының басы ғана.
