Қазцинк-тің Өскемен металлургия кешенінде бұл жолы өндірістік жоспар немесе технология емес, елдің болашағы талқыланды.
Кәсіпорын алаңында «Әділетті және Прогрессивті Қазақстанның Халықтық Конституциясы үшін!» жалпыұлттық коалициясы мүшелері еңбек ұжымымен кездесті, деп хабарлайды DKNews.kz.
Жиынға ҚР Премьер-министрінің орынбасары – Мәдениет және ақпарат министрі Аида Балаева, Мәжіліс депутаттары, ҚР Кәсіподақтар федерациясының төрағасы Сатыбалды Дәулеталин және кәсіпорын мамандары қатысты.
Металлургия – экономиканың тірегі
Өскемен – еліміздің түсті металлургиясының жүрегі. Мыңдаған отбасының нәпақасы осы саламен тікелей байланысты. Сондықтан жаңа Конституция жобасы туралы әңгіме дәл осы өндіріс орнында қозғалғаны кездейсоқ емес.
Аида Балаева металлургияның Қазақстан экономикасындағы стратегиялық рөлін атап өтті. Оның сөзінше, бұл сала – экспорттық әлеуетті айқындайтын, құрылыс, машина жасау және энергетиканың дамуына серпін беретін негізгі бағыттардың бірі.
– «Қазцинк» – халықаралық нарықта бәсекеге қабілетті, қарқынды дамып жатқан ұжым. Бірақ өнеркәсіптің әрі қарай дамуы үшін ішкі саяси тұрақтылық аса маңызды. 15 наурызда өтетін референдум – жай рәсім емес. Бұл – әр азаматтың ел тағдырына тікелей қатысу мүмкіндігі, – деді вице-премьер.
Оның айтуынша, жаңа редакцияда Егемендік, Тәуелсіздік, ел аумағының тұтастығы мен басқару нысаны өзгермейтіні нақты бекітіледі. Бұл – ұзақмерзімді тұрақтылықтың құқықтық кепілі.
Еңбек адамы – Конституцияның өзегінде
Жаңа мәтінде еңбек ету құқығы, қауіпсіз еңбек жағдайлары және әділ еңбекақы алу құқығы конституциялық деңгейде бекітілмек. Бұл – әсіресе өндіріс орындарында жұмыс істейтіндер үшін аса маңызды норма.
– Еңбек жағдайы үшін жұмыс беруші мен мемлекеттің жауапкершілігі ең жоғары деңгейде – Конституцияда белгіленеді. Бұл өндірістік жарақатты азайтуға және қызметкерлердің денсаулығын қорғауға бағытталған, – деді Аида Балаева.
Металлургия – тәуекелі жоғары сала. Сондықтан еңбек қауіпсіздігі жай ғана талап емес, адам өмірінің мәселесі. Жұмысшылар үшін бұл нормалар құрғақ сөз емес, күнделікті тіршіліктің шындығы.
Онлайн кеңістіктегі құқықтар да қорғалады
Жиында сөз сөйлеген Мәжіліс депутаты Сергей Пономарев цифрлық дәуірдегі құқықтарға тоқталды. Оның айтуынша, жаңа Конституция интернеттегі хат алмасу құпиясын, жеке деректер мен зияткерлік меншікті қорғауды күшейтеді.
– Мемлекет жеке деректерді конституциялық деңгейде қорғауға алады. Бұл ақпараттың заңсыз таралмауы, сатылмауы және адамға қарсы пайдаланылмауы үшін маңызды, – деді депутат.
Қазіргі заманда өндіріс те, басқару да, жеке өмір де цифрландырылған. Сондықтан онлайн кеңістіктегі қауіпсіздік – жаңа шындықтың талабы.
19 мың адамның таңдауы
Бүгінде «Қазцинк» компаниясында 19 мыңға жуық адам еңбек етеді. Оның 4 мыңы – Өскемен металлургия алаңында. Қызметкерлердің төрттен бірі – әйелдер. Бұл – ауыр өндірісте де әйелдердің үлесі артып келе жатқанын көрсетеді.
Өскемен металлургия кешенінің директоры Тимур Тоқжігітов алдағы референдумды стратегиялық маңызы бар шешім деп бағалады.
– Біз өндірістік жоспарды да, отбасылық болашақты да ұзақ мерзімге құрып отырмыз. Сондықтан елдің даму бағыты біз үшін өте маңызды. 15 наурыздағы референдумға міндетті түрде қатысамыз, – деді ол.
Мыс зауытының балқыту цехының аға шебері Аслан Тұрғамбаев та еңбек адамының рөлі күшейіп келе жатқанын айтты.
– Біз тәртіп пен нақты нәтижеге үйренгенбіз. Жаңартылған Конституция әлеуметтік кепілдіктерді нығайтып, әділетті жүйе қалыптастыруға жол ашады, – деді ол.
Өндірістен басталған диалог
Өскемендегі кездесу бір нәрсені анық көрсетті: Конституция туралы талқылау тек саясаткерлердің деңгейінде қалып қойған жоқ. Ол өндіріс алаңына, нақты еңбек адамдарының ортасына келді.
Металлургтер үшін бұл – абстрактілі құжат емес. Бұл – қауіпсіз жұмыс орны, әділ еңбекақы, балалардың болашағы, елдегі тұрақтылық.
15 наурызда өтетін референдум – әр азаматтың таңдауы. Ал Өскемендегі өндіріс ұжымы бұл таңдауға бейжай қарамайтынын ашық айтты.
