Жамбыл облысының Төтенше жағдайлар департаментінде Тараз қаласында болған өрт кезінде батылдық көрсеткен азаматтарды марапаттау рәсімі өтті. Салтанатты шарада Қарулы күштердің әскери қызметшісі Ерғали Кенжебаев ерекше ерлігі үшін медальмен наградталды, деп хабарлайды DKNews.kz.
Әскери қызметші «Өртте көрсеткен қайсарлығы үшін» медалін алды
Оңтүстік өңірлік қолбасшылығы тау қорықшылары полкінің жауынгері, 3-сыныпты сержант Ерғали Кенжебаев «Өртте көрсеткен қайсарлығы үшін» медалімен марапатталды.
Сондай-ақ адамдарды эвакуациялауға көмектескен Тараз қаласының тұрғыны Таймырза Сейітханға алғыс хат табысталды.
Өрт кезінде адамдарды құтқарды
Оқиға 1 қаңтар күні Тараз қаласында болған.
Жанармай бекетінде жүрген Ерғали Кенжебаев Жамбыл даңғылы бойындағы «Dr. Watson» мекемесінен шыққан қою түтінді байқайды.
Әскери қызметші:
- оқиға орнына бірден жетеді
- ғимараттың жазғы жапсарлас бөлігінен шыққан өртті көреді
- кіреберіс бөлікті қалың түтін басқанын байқайды
Баланы түтін арасынан алып шықты
Төтенше жағдай қызметкерлерін күтпестен және өз өміріне қауіп төнгеніне қарамастан әскери қызметші батыл әрекет етеді.
Ерғали Кенжебаев:
- түтінге толы жертөлеге кірді
- бір баланы қауіпсіз жерге алып шықты
- кейін қайта оралып, ғимараттағы адамдарды эвакуациялауға көмектесті
Батылдық үлгісі
Жамбыл облысы Төтенше жағдайлар департаментінің басшысы, полковник Арман Тоқанов әскери қызметшінің әрекетін жоғары бағалады.
Мұндай істер азаматтық жауапкершілік, жанашырлық пен қиын сәтте қол ұшын созуға әзір тұрудың айқын үлгісі. Марапатталғандардың батылдығы мен жанқиярлығы шынайы құрмет пен бағалауға тұрарлық, – деді ол.
Өрт кезінде азаматтар «Dr. Watson» мекемесіне келген адамдарды қауіпсіз жерге шығарып, болуы мүмкін ауыр салдардың алдын алды.
