Қазақстанның Бельгиядағы Елшісі Роман Василенко Фландрия Үкіметінің Министр-президенті Маттиас Диепендалемен кездесу өткізді. Кездесу барысында тараптар Қазақстан мен Фландрия өңірі арасындағы ынтымақтастықтың перспективаларын талқылап, сауда-экономикалық, өнеркәсіптік, логистикалық және инновациялық өзара іс-қимылды дамыту мәселелеріне ерекше назар аударды, деп хабарлайды DKNews.kz.
Фландрия – Еуропадағы маңызды өнеркәсіптік өңір
Роман Василенко Қазақстан Фландрияны қуатты өнеркәсіптік базасы, дамыған логистикалық инфрақұрылымы және мықты инновациялық экожүйесі бар Бельгияның ең серпінді әрі индустриялық дамыған өңірлерінің бірі ретінде қарастыратынын атап өтті.
Оның айтуынша, Қазақстан жетекші еуропалық өңірлермен нақты жобаларға негізделген ұзақ мерзімді серіктестікті дамытуға мүдделі.
Орта дәліз бен Антверпен-Брюгге портына назар аударылды
Кездесу барысында көлік-логистикалық ынтымақтастық мәселелері де талқыланды.
Елші Орталық Азия мен Еуропаны байланыстыратын Транскаспий халықаралық көлік бағытының, яғни Орта дәліздің стратегиялық маңызын атап өтті. Сонымен қатар Еуропаның ірі логистикалық хабтарымен, оның ішінде әлемдегі ең ірі порттық және мұнай-химия кластерлерінің бірі саналатын Антверпен-Брюгге порттық кешенімен өзара іс-қимылды дамыту мәселесі қозғалды.
Бірқатар салалардағы ынтымақтастық мүмкіндіктері қарастырылды
Тараптар химия және мұнай-химия өнеркәсібі, фармацевтика және биотехнология, агроөнеркәсіптік кешен мен тамақ өнеркәсібі салаларындағы ынтымақтастық перспективаларын талқылады.
Сонымен қатар инновациялар, жасанды интеллект, цифрлық технологиялар және ғылыми-білім беру салаларындағы байланыстарды дамыту мәселелері көтерілді. Бұл бағытта Қазақстан мен Фландрия университеттері, ғылыми орталықтары және инновациялық кластерлері арасындағы серіктестікті нығайту мүмкіндіктері қарастырылды.
Қазақстандағы реформалар туралы ақпарат берілді
Кездесу барысында елші Қазақстанда жүзеге асырылып жатқан саяси және әлеуметтік-экономикалық реформалар туралы да айтты.
Оның айтуынша, Қазақстанда жаңа Конституция жобасы әзірленіп, ол бойынша түпкілікті шешім 15 наурызда өтетін жалпыұлттық референдумда қабылданады. Жоба мемлекеттік басқарудың тиімділігін арттыруға, заң үстемдігін нығайтуға және азаматтардың қоғамдық-саяси өмірге қатысу мүмкіндігін кеңейтуге бағытталған.
Фландрия Қазақстанмен ынтымақтастыққа қызығушылық білдірді
Фландрия Үкіметінің министр-президенті Маттиас Диепендале фламанд компаниялары, ғылыми мекемелері мен қазақстандық серіктестер арасындағы ынтымақтастық әлеуетін жоғары бағалады.
Ол Қазақстанмен экономикалық және технологиялық байланыстарды дамытуға қызығушылық бар екенін атап өтті.
Еуропадағы ең ірі экономикалық өңірлердің бірі
Фландрия – Бельгияның экономикалық тұрғыдан ең ірі өңірі.
2024 жылы өңірдің жалпы ішкі өнімі 332,6 млрд еуроны құрады, ал жан басына шаққандағы ЖІӨ шамамен 47 мың еуро болып, бұл Еуропалық одақтың орташа көрсеткішінен жоғары.
Өңір экономикасында өнеркәсіп, логистика, химия және фармацевтика, машина жасау, биотехнология, агроазық-түлік секторы, сондай-ақ инновациялар мен цифрлық технологиялар маңызды рөл атқарады.
