Республикалық референдум өтіп жатқан кезеңде заңдылықтың сақталуын прокуратура органдары қатаң бақылауда ұстап отыр. ҚР Бас прокуратурасы Қоғамдық мүдделерді қорғау қызметі басқармасының басшысы Бекжан Қараманов «Референдум – 2026» онлайн марафонында дауыс беру күні үгіт-насихат жүргізуге толық тыйым салынғанын атап өтті, деп хабарлайды DKNews.kz.
Заң талаптары
Бекжан Қарамановтың айтуынша, дауыс беру күні келесі әрекеттерге жол берілмейді:
- Қоғамдық пікірге сауал салу нәтижелерін БАҚ-та және онлайн платформаларда жариялау
- Дауыс беру үйінде немесе дауыс беру пунктінде сауал салу жүргізу
«Сондықтан заң талаптарын мүлтіксіз орындауға шақырамын», – деді Бас прокуратура өкілі.
Жауапкершілік
Бұл талаптарды орындамау Әкімшілік құқық бұзушылық туралы кодекстің 102-ші және 120-баптары бойынша әкімшілік жауапкершілікке әкеп соғады.
Өтініштер мен құқықтық бақылау
Референдумға қатысты өтініштер прокуратура мен соттар тарапынан дереу қаралуға міндетті. Қазірге дейін мұндай өтініштер түспеген.
«Жалпы дауыс беру процесі құқықтық алаң аясында өтуде. Референдум өткізу кезінде заңдылықты сақтауды қамтамасыз ету бойынша жұмыс жалғасуда», – деп түйіндеді Бекжан Қараманов.
Бұл шаралар азаматтардың құқықтарын қорғауға, референдум процесінің ашық әрі әділ өтуіне бағытталған.
