Қазақстанда өтіп жатқан республикалық референдумға халықаралық байқаушылар белсенді түрде қатысуда. Солардың қатарында Тәжікстан Республикасының Орталық сайлау және референдум комиссиясының төрағасы Худоёрзода Бахтиёр бар, деп хабарлайды DKNews.kz.
Ол Қазақстанға ТМД, Шанхай ынтымақтастық ұйымы, Парламентаралық ассамблея және Ұжымдық қауіпсіздік туралы шарт ұйымы миссиясы құрамында келгенін атап өтті.
Халықаралық бақылаушылар пікірі
«Біз Қазақстанның Орталық сайлау комиссиясының шақыруымен референдумды дайындау және өткізу барысын бақылауға келдік. Астанада болған уақыт ішінде референдумға дайындық жұмыстарымен таныстық, сондай-ақ бүгін дауыс беру процесін тікелей бақыладық», – деді Худоёрзода Бахтиёр.
Бақылаушының пікірінше, референдумды ұйымдастыру үшін ауқымды және жан-жақты дайындық жұмыстары жүргізілген. Учаскелік және аумақтық комиссия мүшелері барлық кезең бойынша арнайы дайындықтан өткен.
«Бұл Қазақстанның Орталық сайлау комиссиясы саяси науқанды жоғары деңгейде ұйымдастырғанын көрсетеді. Дауыс беру құқығы бар азаматтар учаскелерге еркін және өз еркімен келіп, дауыс беруде. Бұл – референдум өткізу кезінде азаматтардың еркін таңдауы мен ашықтық принциптерінің сақталып отырғанының дәлелі», – деді ол.
Сөз соңында Худоёрзода Бахтиёр Қазақстан халқына бейбітшілік, бірлік пен тұрақты даму тілегін жеткізді.
