Қазақстанда өткен республикалық референдум ел тарихындағы маңызды саяси оқиғалардың бірі ретінде бағалануда. Дауыс беру аяқталғаннан кейін Президент Қасым-Жомарт Тоқаев «Қазмедиа орталығының» студиясында жарияланған экзит-полл нәтижелерімен танысып, арнайы мәлімдеме жасады, деп хабарлайды DKNews.kz.
Мемлекет басшысы бұл күнді Қазақстан үшін ерекше тарихи кезең деп атады.
«Бүгін – Қазақстан үшін тарихи күн»
Президенттің айтуынша, референдумға қатысқан азаматтар елдің болашағын ойлап, маңызды шешім қабылдады.
– Бүгін – Қазақстан үшін тарихи күн! Еліміздің азаматтары конституциялық реформаны қолдап, референдумға белсенді түрде қатысты. Отанымыздың болашағын ойлап дауыс берді. Бұл – өте жақсы оқиға. Қазір ғана экзит-поллдың нәтижелері шықты. Соған сәйкес қазақ елі түбегейлі тарихи таңдауын жасады. Халқымызға шынайы ризашылығымды айтқым келеді. Бүгін жұртымыз дауыс беріп, Қазақстанның тарихын, тағдырын айқындады. Бұл шешім дүние жүзі тарихында мәңгі сақталады. Бұл мәселе бойынша ешқандай күмәнім жоқ. Өйткені бұл – азаматтарымыздың бойындағы нағыз отаншылдық нышаны. Енді жыл сайын 15 наурызды – Конституция күні, яғни, еліміздің ең басты мерекесінің бірі ретінде қарсы аламыз. Себебі Қазақстан халқы жаңару мен жаңғыру үшін дауыс берді. Бұл – біздің бәрімізге ортақ жетістік. Баршаңызды шын жүректен құттықтаймын! – деді Мемлекет басшысы.
Президент халықтың белсенділігі мен азаматтық жауапкершілігін ерекше атап өтті.
Референдум ашық әрі әділ өтті
Қасым-Жомарт Тоқаевтың пікірінше, жалпыұлттық референдум жоғары деңгейде ұйымдастырылған. Мемлекет басшысы дауыс беру барысында барлық заң талаптары мен демократиялық нормалар қатаң сақталғанын айтты.
Президенттің сөзінше, мұны еліміздің де, шетелдік те байқаушылары атап өткен.
Сонымен бірге референдумның ресми нәтижелерін заң талаптарына сәйкес Орталық референдум комиссиясы жариялайтыны айтылды.
Қоғам бірлік пен жауапкершіліктің үлгісін көрсетті
Президент азаматтардың таңдауы елдің болашағына деген жауапкершіліктің айқын көрінісі екенін айтты.
– Азаматтар жасаған таңдаудың түпкілікті қорытындысын заңға сәйкес Орталық референдум комиссиясы ресми тәртіппен шығарады. Бірақ қазірдің өзінде Қазақстан халқы ынтымақ пен бірліктің, патриотизмнің, Отан тағдырына ортақ жауапкершіліктің керемет үлгісін көрсетті деп айта аламыз. Азаматтарымыздың басым бөлігі Өркендеу, Әділет, Заң мен Тәртіп, Табиғатты аялау және Тазалық жолын таңдады. Бұл – өте жақсы жол.
Президенттің айтуынша, дауыс беруге келген азаматтардың саны рекордтық көрсеткішке жеткен.
Мұндай жоғары белсенділік соңғы жылдары сирек байқалған.
«Жаңа Конституция – Тәуелсіздік пен егемендік тірегі»
Мемлекет басшысы жаңа Конституция елдің болашақ даму бағытын айқындайтын негізгі құжат екенін айтты.
– Жаңа Халық Конституциясы елімізді тың жетістіктер мен табыстарға бастайды. Бұған ешқандай күмән жоқ. Дауыс берушілер саны бойынша ең жоғары рекордтық көрсеткіш тіркелді. Мұндай жағдай көптен бері болмап еді. Учаскеге келіп, азаматтық ұстанымын анық білдірген баршаға алғыс айтамын. Осы арқылы күллі әлемге қазақ қоғамының саяси мәдениеті жоғары екенін паш еттік.
Президент бірлік пен тұрақтылықтың маңызын да атап өтті.
– «Бірлік бар жерде тірлік бар». Бірлік бар жерде өркендеу бар. Елдің қуаты – бірлікте. Бізге татулық пен достық, сабырлық пен табандылық, жасампаздық пен ұқыптылық, еңбекқорлық пен сенімділік ауадай қажет. Сонда ғана озық, дамыған, бәсекеге қабілетті ел боламыз.
Ұлт тарихының жаңа парағы ашылды
Президенттің айтуынша, бүкіл халық қолдаған жаңа Конституция елдің басты темірқазығына айналады.
– Жаңа Конституция – Тәуелсіздік пен егемендік тірегі. Ата заңымыз – адам құқығы мен бостандығының мызғымас кепілі. Біз бір ел болып Заң мен тәртіп сақталатын, жауапты және жасампаз азаматтары бар Әділетті қоғам құру жолында маңызды қадам жасадық. Осылайша, бүгін ұлт тарихының жаңа парағын аштық.
Алдағы уақытта елде ауқымды жұмыстар жалғасатыны да айтылды.
Жастардың белсенділігі ерекше атап өтілді
Мемлекет басшысы референдум кезінде жастардың белсенді қатысқанын ерекше атап өтті.
– Алда ауқымды жұмыстар күтіп тұр. Ең бастысы, халқымыз түбегейлі өзгерістерді барынша қолдайды. Біз ортақ мүдде жолында күш біріктіріп, келер ұрпаққа Өркениетті, Озық Қазақстанды аманат етеміз. Мен бұған кәміл сенемін. Осы референдум кезінде жастар белсенді түрде сайлауға қатысты. Жастарымызға мың да бір рақмет! Жастарымыздың дауысы, үні өте жақсы естілді. Әрқашан аман болыңыздар! Қазақ елінің қасиетті Тәуелсіздігі мәңгі болсын! Отанымыз – Қазақстан Республикасы жасай берсін! Жаңа Конституциямыз құтты болсын! – деді Қасым-Жомарт Тоқаев.
