Қазақстанда өткен республикалық референдумға халықаралық ұйымдардың бақылаушылары да баға берді. Ислам ынтымақтастығы ұйымының өкілдері дауыс беру нәтижелері азаматтардың елдің конституциялық болашағын қалыптастыруға белсенді қатысқанын көрсететінін мәлімдеді, деп хабарлайды DKNews.kz.
Халықаралық бақылаушылардың қорытындысы
Халықаралық байқаушыларға қолғабыс көрсету орталығында өткен баспасөз конференциясында Ислам ынтымақтастығы ұйымы Бас хатшылығының Азия басқармасының басшысы Имран Садихов байқау миссиясының қорытындыларымен бөлісті.
Оның айтуынша, референдумның алдын ала нәтижелері азаматтардың кеңінен қатысқанын көрсетеді.
«Референдумның алдын ала нәтижелері азаматтардың кеңінен қатысқанын көрсетеді, бұл Қазақстан халқының елдің конституциялық болашағын қалыптастыруға белсенді араласқанын айқындайды. Бас хатшылық референдумның бейбіт әрі тәртіппен өткенін жоғары бағалайды және халықаралық байқаушылардың жұмысына қолдау көрсеткені үшін Қазақстан билігіне алғыс білдіреді. Бас хатшылық Қазақстан басшылығы мен халқын осы маңызды ұлттық оқиғаның сәтті өтуімен құттықтайды».
Қазақстанға қолдау білдірілді
Имран Садиховтың айтуынша, Қазақстан Ислам ынтымақтастығы ұйымының белсенді және маңызды мүшелерінің бірі болып қала береді. Сонымен бірге ұйым елде конституциялық институттарды нығайту, тұрақтылықты қамтамасыз ету және орнықты дамуды ілгерілету бағытындағы бастамаларды қолдайтынын білдірді.
Халықаралық бақылаушылар референдумның бейбіт әрі ұйымдасқан түрде өткенін атап өтті.
