2026 жылғы 28 наурыз күні бүкіл әлемде табиғи ресурстарды орынды әрі жауапкершілікпен тұтынуға үндеу мақсатында халықаралық «Жер сағаты» акциясы өтеді. Бұл маңызды экологиялық бастамаға Астана қаласы да қосылады. Акция аясында елордадағы «Хан Шатыр» сауда-ойын-сауық орталығында интерактивті іс-шара ұйымдастырылатын болады, деп хабарлайды DKNews.kz.
«Жер сағаты» акциясының мақсаты
«Жер сағаты» – дүниежүзілік жабайы табиғатты қорғау қоры (WWF) бастамасымен өткізілетін халықаралық акция. Оның негізгі мақсаты – қоршаған ортаны және ғаламшар экожүйелерін сақтау мәселелеріне, әсіресе жаһандық климаттың өзгеруіне назар аударту. Бұл күні әлем халқы бір сағатқа ғимараттар мен ескерткіштердің жарығын, сыртқы жарықтандыруды және тұрмыстық электр құрылғыларын өшіріп, экологиялық жауапкершілік танытады.
Астана қаласындағы «Жер сағаты»
Биылғы «Жер сағаты» акциясы Астанада «Таза Қазақстан» экологиялық бастамасы аясында өтеді. Сағат 20:30-дан 21:30-ға дейін елордадағы ондаған нысан жарығын және сәндік шамдарын бір сағатқа сөндіреді. Бұл шара қаланың экологиялық жағдайына назар аудартып, халықты табиғи ресурстарды үнемдеуге шақыру мақсатында өткізіледі.
«Хан Шатыр» сауда-ойын-сауық орталығындағы іс-шара
Акцияның басты іс-шарасы Астана қаласының ең ірі сауда-ойын-сауық орталығы «Хан Шатырда» өтеді. Іс-шара сағат 19:30-да құттықтау сөзімен басталады. Осыдан кейін «Stop musor» әлеуметтік жобасы мен серіктестерінің сыйлықтары табысталатын викторина ұйымдастырылады. Мерекелік бағдарлама елордалық әртістер мен шығармашылық ұжымдардың қатысуымен концертке ұласады.
Кері санақ және жарықтың өшірілуі
«Жер сағаты» акциясының басталуына бір минут қалғанда кері санақ жүргізіліп, қала бойынша барлық нысандардың жарығы өшіріледі. Бұл әлем бойынша экологиялық мәселелерге назар аударудың символдық және маңызды бір бөлігі болмақ.
Іс-шараны ұйымдастырушылар
«Жер сағаты» акциясы ҚР Экология және табиғи ресурстар министрлігі, Астана қаласының әкімдігі, «Қазақстанның экологиялық ұйымдары қауымдастығы» ЗТБ және «Жасыл экономика және G-Global дамыту коалициясы» ЗТБ тарапынан ұйымдастырылуда.
Халықаралық қатысу
Бүгінде «Жер сағаты» – әлемдегі ең ауқымды экологиялық акциялардың бірі. Оған 175-тен астам ел мен 8 мыңға жуық қалада 2 миллиардтан астам адам қатысады. Бұл акция әрбір адамға табиғатқа жауапкершілікпен қарауды, қоршаған ортаға деген қамқорлықты арттыруды насихаттайды.
