Астанада өткен семсерлесуден Әлем кубогының кезеңі жай ғана тарихи оқиға емес болды. Бұл жарыс қазақстандық спорт үшін үлкен серпіліске айналып, сонымен қатар отандық спортшылар үшін маңызды эмоционалдық сынақ болды. Себебі Қазақстан өз тарихында алғаш рет осы спорт түрінен Әлем кубогының кезеңін қабылдады.
Турнир Халықаралық семсерлесу федерациясының (FIE) қолдауымен өтті. Оған әлемнің 60-тан астам елінен 500-ден астам спортшы қатысты. Қазақстан атынан 30 спортшы сынға түсті. Іріктеу кезеңінің қорытындысы бойынша ерлер арасында Ерлік Сертай, Кирилл Проходов және қазақстандық семсерлесудің басты жұлдызы Руслан Курбанов негізгі кезеңге өтті. Әйелдер арасында Ирина Бакалдина жарыстың негізгі кезеңіне жолдама алды.
Қазақстандық спортшылар жоғары нәтиже көрсетіп, әлемнің үздік семсерлесушілерін жеңе білді. Атап айтқанда, Руслан Курбанов өзінің көптен бергі қарсыласы, Олимпиада және әлем чемпионы жапониялық Коки Каноны жеңді.
«Біздің қарсыластық тарихымыз өте ұзақ. Шынымды айтсам, мен оны бұрын жеңгенімді есіме түсіре алмаймын. Соңғы рет біз Олимпиадада кездескенбіз: мен француз олимпиада чемпионын жеңдім, бірақ кейін Каноға жол бердім, ал ол сол жарыста чемпион атанды. Ең үздік болғың келсе, мұндай қарсыластардан өтуің керек екенін түсінемін. Жаңа жаттықтырушы Александр Владимировичтің келуімен мен оның стилін жақсырақ түсіне бастадым. Ол жекпе-жекті қалай құруды, қарсыласқа қалай тосқауыл қоюды, қақпан құруды және өзім соған түспеуді үйретті.
Семсерлесуде бәрі стратегияға негізделген: алдымен барлау жүреді, ешкім бірден шабуылға шықпайды. Алғашқы минуттарда спортшылар бір-бірін зерттеп, әлсіз тұстарын іздейді. Тек содан кейін ғана нағыз жекпе-жек басталады. Сондықтан оны жеңгеніме өте қуаныштымын. Оған деген құрметім зор – ол үлкен спортшы, еңбекқор әрі өте тәрбиелі адам», – деді Руслан Курбанов.
Турнирдің шешуші кезеңдері 28–29 наурыз күндері өтті. Нәтижесінде Кирилл Проходов пен Ирина Бакалдина өз санаттарында әлемнің үздік 16 спортшысы қатарына енді. Бакалдинаның нәтижесі Қазақстан тарихындағы әйелдер арасындағы шпагада ең үздік көрсеткіш болды.
Ерлер арасындағы жекелей сында алтын медальді украиналық Роман Свичкарь жеңіп алды. Руслан Курбанов күміс жүлдеге ие болды. Қола медальді мажарыстандық Давид Наги мен мысырлық Мухамед Эльсаид иеленді. Турнирден кейін Эльсаид әлемдік рейтингтің бірінші орнына көтерілді.
«Турнирді Корея спортшысына қарсы бастадым – бұл мен үшін орташа деңгейдегі жекпе-жек болды. Кейін Гонконг спортшысымен өте ауыр кездесу өтті, оны 15:14 есебімен, соңғы соққымен жеңдім. Одан кейін Германия спортшысын ұтып, жартылай финалда кейін чемпион атанған украиналық спортшыға жол бердім. Әрине, ол ең қиын қарсылас болды. Бірақ мен тек оның мықтылығынан жеңілдім деп айтпас едім, дегенмен сол сәтте ол жақсырақ өнер көрсетті. Джетлаг та әсер етті: мен АҚШ-та тұрамын, уақыт айырмашылығы 12 сағат, бұл менің жағдайыма әсер етті. Соған қарамастан, осы турнирден кейін мен қайтадан әлемдік рейтингте бірінші орынға көтерілемін, бұл мені қуантады», – деді Мухамед Эльсаид.
Әйелдер арасында алтын медальді кореялық Сонг Сера жеңіп алды. Күміс жүлде эстониялық Катрина Лехиске бұйырды. Франциялық Диана фон Керссенброк пен италиялық Альберта Сантуццио қола жүлдегер атанды.
Командалық жарыста Қазақстанның ерлер құрамасы үздік төрттікке енді. Жартылай финалда Франция құрамасына есе жіберді, ал франциялықтар турнир жеңімпазы атанды. Қола үшін өткен кездесуде Жапония құрамасы екі ұпай айырмашылығымен жеңіске жетті. Қорытындысында: Франция – бірінші орын, Италия – екінші, Жапония – үшінші.
Әйелдер командалары арасында: Корея – бірінші орын, АҚШ – екінші, Италия – үшінші орынға ие болды.
Айта кету керек, Астанадағы Әлем кубогының ұйымдастырылуы жоғары бағаланды. Қатысушылар жарыстың деңгейін әлем чемпионатымен салыстырып, инфрақұрылым мен ұйымдастыру сапасын ерекше атап өтті. Астана бұл турнирде әлемнің үздік шпага шеберлерін жинай алды.
«Тамаша арена және керемет турнир. Қала да өте ұнады – біраз аралап үлгердік. Ботаникалық бақтың жанында тұрдық, мешітке бардық, бәрі өте әсерлі болды. Қарсыластарға келсек, бірнеше өте қиын жекпе-жек өткіздім. Мысалы, қытайлық Ли Фаньюмен кездестім – біз бұған дейін Хайденхаймдағы турнирде кездескенбіз, бұл әрдайым физикалық тұрғыдан ауыр қарсыласу. Ол өте мықты спортшы, сондықтан оны жеңгеніме қуаныштымын. Кейін чехиялық Якуб Юркамен кездестім – өте қуатты қарсылас. Ол 14:13 есебімен алда болды, бірақ мен екі дәл соққы жасап, жеңісті жұлып алдым. Техника тұрғысынан ең қиын қарсылас Юрка деп айтар едім. Ол осы жағынан ең мықты болды», – деді даниялық Конрад Конгстад.
«Турнир өте керемет өтті, маған бәрі ұнады. Шынын айтқанда, тұғырға көтерілген жарысты ұнатпау мүмкін емес. Бірақ нәтиже ғана емес, атмосфера да ерекше болды. Негізгі зал, трибунадағы көрермендер – бәрі жарыстың ерекше рухын сездірді. Мен қола медаль жеңіп алдым, бірақ командалық жарыста бізде бәрі сәтті болмады. Мен қатты шаршадым, жігіттер де алдыңғы күні ауыр күн өткізді, тіпті біреуіміз уланып қалды. Сондықтан біз ең жақсы формада болмадық. Нәтижесінде оныншы орын алдық, бірақ бұл – тәжірибе. Біз үйренеміз және алға жылжимыз», –мажарыстандық спортшы Давид Наги осылай қорытындылады.
Бұл Әлем кубогының кезеңі Қазақстанда семсерлесудің үлкен қызығушылық тудыратынын және трибуналарды толтыра алатынын көрсетті. Турнир еліміздің халықаралық деңгейдегі жарыстарды жоғары деңгейде өткізе алатынын дәлелдеп, Қазақстанның беделін нығайтты. Мұнда спорт тарихы драма, реванш және соңғы соққыға дейінгі тартыс арқылы жазылады.
