Шымкент қаласындағы теміржол вокзалында Ақтау гарнизонының теңіз жаяу әскерлері бригадасында мерзімді әскери қызметін аяқтаған сарбаздарды салтанатты қарсы алу рәсімі өтті. Перрон маңы көптен күткен кездесу мен қуанышқа толы сәттердің куәсіне айналды, деп хабарлайды DKNews.kz.
Сарбаздарды кімдер қарсы алды
Әскерден оралған жастарды қарсы алуға:
- қорғаныс істері жөніндегі департамент өкілдері
- «Оңтүстік» өңірлік қолбасшылығы 35748 әскери бөлімінің басшылығы
- Қарулы күштердің ардагерлері
- сарбаздардың туған-туыстары
жинаылды.
Шара барысында ата-аналарға Отан алдындағы борышын абыроймен өтеген азамат тәрбиелегені үшін алғыс айтылып, сарбаздардың өздеріне де құрмет көрсетілді.
«Бұл дәстүрге айналды»
Шымкент қаласы қорғаныс істері жөніндегі департаментінің бастығы, полковник Әбдіғабит Шегебаев мұндай рәсімдердің маңызын атап өтті.
– Бүгін жиырмадан астам азамат үйлеріне оралды. Олар өздерінің әскери міндеттерін абыроймен атқарды. Теңіз жаяу әскерлеріндегі қызмет мінезді ғана шыңдап қоймай, ерік-жігерді қатайтатын және жауапкершілікке үйрететін сынақ. Біз олардың өздеріне сенімді және шымыр болып оралғандарын көріп отырмыз, – деді ол.
Оның айтуынша, сарбаздарды салтанатты түрде шығарып салу мен қарсы алу рәсімдері бүгінде жақсы дәстүрге айналған.
Әскер – өмір мектебі
Жастар үшін бір жылдық әскери қызмет үлкен тәжірибе болғаны байқалады.
Қызмет барысында олар:
- қарқынды жаттығулардан өтті
- марш жүгіру мен дабыл бойынша әрекет етуді үйренді
- физикалық және психологиялық тұрғыдан шыңдалды
Сарбаздардың айтуынша, әскер оларды тәртіпке, жауапкершілікке және төзімділікке үйреткен.
Қатардағы жауынгер Жансерік Қасымханұлы өз әсерімен бөлісті:
– Әскерде сен үйіңнің, отбасыңның және жақындарыңның қолдауын шынымен бағалай бастайсың. Бұл жыл маған көп нәрсе үйретті. Теңіз жаяу әскерінде қызмет етіп, осы команданың құрамына кіргенімді мақтан етемін.
Кездесудің әсерлі сәттері
Сарбаздардың туған-туыстарымен қауышуы ерекше эмоцияларға толы болды. Көпшілік үшін бұл – ұзақ күткен сәт.
Жауынгердің әпкелері Арайлым мен Назерке де қуаныштарын жасырмады:
– Інімді шығарып салған кезде, әрине, алаңдадық. Бүгін біз оның қалай өзгергенін көрдік. Шымыр, байсалды, өзіне сенімді бола түскен. Осы уақыт ішінде онымен сөйлесіп тұрдық. Енді көріп, құшағымызға алғанымызға қуаныштымыз.
Азаматтық өмірге жаңа қадам
Әскери қызмет барысында жастар:
- қару-жарақ пен техниканы меңгерді
- әскери-есептік мамандық алды
- азаматтық өмірге қажет дағдыларды игерді
Салтанатты кездесу гүлдер, түрлі-түсті шарлар және ыстық құшақтарға ұласып, қатысушыларға ерекше әсер сыйлады. Бұл күн сарбаздар мен олардың жақындары үшін ұмытылмас сәттердің біріне айналды.
