Қазақстанда жөндеуші кіші мамандар даярлайтын оқу орталығының алғашқы түлектері оқуын аяқтады. 4,5 айлық қысқа мерзім ішінде мерзімді әскери қызметшілер тек әскери салада ғана емес, азаматтық экономикада да сұранысқа ие мамандықтарды меңгеріп шықты, деп хабарлайды DKNews.kz.
Тоғыз бағыт бойынша дайындық
Оқу орталығы өткен жылы Қорғаныс министрінің шешімімен құрылған. Мұнда мамандар даярлау бірнеше бағытты қамтиды:
- зымыран-артиллериялық қару-жарақты жөндеу
- сауытты автокөлік техникасын қалпына келтіру
- металл өңдеу
- ағаш өңдеу
- дәнекерлеу ісі
- моторист мамандығы
- аккумулятор электригі
Бұл бағыттар әскери техниканы күтіп ұстаумен қатар, азаматтық секторда да кеңінен қолданылады.
Түлектердің таңдауы
Оқу қорытындысы бойынша курсанттар емтихандарды сәтті тапсырып, сертификаттарға ие болды. Оқу орталығы басшылығы олардың бір бөлігі әскери қызметті жалғастыруға ниетті екенін атап өтті.
– Оқу қорытындысы бойынша курсанттар емтихандарды сәтті тапсырып, өз мамандықтары бойынша сертификаттар алды. Сонымен қатар әскери қызметшілердің 30%-ы келісімшарт бойынша қызметін жалғастыру туралы шешім қабылдап отыр. Бұл олардың ынтасының жоғарылығын және алған білімдерінің сұранысқа ие екенін көрсетеді. Қалған мамандар әрі қарай қызмет өткеру үшін әскери бөлімдерге жіберіледі, – деді оқу орталығының бастығы подполковник Нұркен Орынбасаров.
Практикаға басымдық берілген бағдарлама
Курсанттар дайындық барысында:
- жас жауынгер курсын өтті
- мамандандырылған оқытудан өтті
- техниканы жөндеу және диагностикалау дағдыларын меңгерді
- далалық жағдайда жұмыс істеуді үйренді
Оқыту барысында практикалық машықтарға ерекше көңіл бөлінді.
Әскерден – мамандыққа
Түлектердің бірі өз тәжірибесімен бөлісті:
– Армияға дейін автоэлектрик ретінде орта арнайы білім алғанмын. Мұнда сауытты машиналарды жөндеу мамандығын игеріп, өзіме ұнайтынын түсіндім. Келісімшарт бойынша қызмет етіп, осы бағытта дамуды ұйғарып отырмын, – деді мерзімді қызмет түлектерінің бірі қатардағы жауынгер Нұрдос Жұмабеков.
Жоба жалғасады
Оқу орталығын дамыту – әскери қызметшілердің кәсіби деңгейін арттыруға бағытталған жүйелі жұмыстың бір бөлігі. Мұнда алынған білім болашақта:
- өнеркәсіптік секторда
- көлік саласында
- техникалық қызмет көрсету бағытында
жұмысқа орналасуға мүмкіндік береді.
Биыл оқу бағдарламасын кеңейту жоспарланып отыр. Атап айтқанда:
- ұшқышсыз басқарылатын авиациялық жүйелерді жөндеу
- тренажерлерді қызмет көрсету
- полигондық жабдықтарды жөндеу
бағыттары енгізіледі. Сонымен қатар білім алушылар саны да артпақ.
