Қазақстанда алғаш рет облигациялар нарығына арналған кешенді халықаралық анықтамалық жарияланды. «Қазақстан үшін облигациялар нарығы бойынша нұсқау» құжатын Қаржы нарығын реттеу және дамыту агенттігі, Ұлттық Банк, Қаржы министрлігі, «Астана» халықаралық қаржы орталығы және Азия даму банкі бірлесіп әзірледі, деп хабарлайды DKNews.kz.
Құжат ASEAN+3 облигациялар нарықтары форумының қолдауымен дайындалған және халықаралық инвесторларға арналған негізгі ақпарат көздерінің бірі болмақ.
Нұсқау нені қамтиды
Анықтамалық Қазақстанның капитал нарығы туралы толық әрі жүйеленген мәлімет береді.
Онда:
- облигациялар нарығының қалыптасу тарихы мен даму кезеңдері
- құқықтық және реттеушілік база
- бағалы қағаздар туралы заңнама мен листинг талаптары
- мемлекеттік және корпоративтік облигациялар, ақша нарығы құралдары, сукук сияқты борыштық құралдар
- KASE және AIX инфрақұрылымы, клиринг және есеп айырысу жүйелері
- АХҚО юрисдикциясының ерекшеліктері
- салық режимі мен шетелдік инвесторлар үшін қолжетімділік шарттары
- нарықтың сын-қатерлері мен даму перспективалары
жан-жақты қамтылған.
Халықаралық инвесторлар үшін бағыт-бағдар
Нұсқау:
- шетелдік инвесторларға
- эмитенттерге
- қаржы делдалдарына
- реттеушілер мен зерттеушілерге
арналған.
Құжат Қазақстанның облигациялар нарығына кіру шарттарын түсінуге және инвестициялық мүмкіндіктерді бағалауға көмектеседі.
Реттеушілер: ашықтық – басты басымдық
Қаржы нарығын реттеу және дамыту агенттігі төрағасының орынбасары Нұржан Тұрсынханов құжаттың маңызын атап өтті.
«Реттеушілік ашықтық – инвесторлар сенімінің негізгі шарты. Нұсқауда қазақстандық бағалы қағаздар нарығының нормативтік-құқықтық базасы егжей-тегжейлі сипатталады және шетелдік қатысушыларға мүмкіндіктерді бағалау кезінде сенімді бағдар береді. Агенттік үздік халықаралық практикаларға сәйкес реттеудің дамуына қарай құжаттың өзектілігін сақтауға ниетті. Бүгінгі күні Агенттік халықаралық консультанттармен бірлесіп, нарықты дамытудың өзге кезеңі үшін құрылған және оның ауқымы мен күрделілігіне бұдан былай жауап бермейтін заңнамалық базаны жаңғырту мақсатында Бағалы қағаздар нарығын дамытудың 2030 жылға дейінгі бағдарламасын және Капитал нарығы туралы жаңа заңды әзірлеуде. Реформа нарықта инвестициялауға арналған жаңа эмитенттер мен құралдардың пайда болуына, инвесторлардың орнықты базасы мен өтімділіктің қалыптасуына, барлық қатысушылардың құқықтары сенімді қорғалуына – және нәтижесінде, капитал нарығының Қазақстан экономикасын қаржыландыруда аса маңызды орынға ие болуына бағытталған».
Ұлттық Банк: нарық экономика үшін маңызды
Ұлттық Банк төрағасының орынбасары Әлия Молдабекова облигациялар нарығының рөлін ерекше атап өтті.
«Облигациялар нарығы экономиканы қаржыландыруда шешуші рөл атқарады және кірістіліктің нарықтық қисығын қалыптастыруды және ақша-кредит саясатының белгілерін тиімді беруді қамтамасыз ете отырып, Қазақстанның қаржы нарығын дамытудың басым бағыттарының бірі болып табылады. Осыған байланысты Қазақстан Республикасының Ұлттық Банкі мемлекеттік органдармен және нарыққа қатысушылармен бірлесіп инфрақұрылымды дамыту, реттеуді жетілдіру, өтімділікті арттыру және инвесторлық базаны кеңейту жөніндегі шаралар кешенін іске асырады. Аталған жұмыс шеңберінде Азия даму банкімен бірлесіп, халықаралық стандарттарға сәйкес нарық туралы ақпаратты құрылымдайтын және оның ашықтығы мен инвестициялық тартымдылығын арттыруға бағытталған Қазақстанның облигациялар нарығы жөніндегі нұсқау дайындалды».
Қаржы министрлігі: нарықтың орнықтылығы артады
Қаржы вице-министрі Дәурен Кеңбейіл мемлекеттік бағалы қағаздардың маңызын атап өтті.
«Мемлекеттік бағалы қағаздардың дамыған және өтімді нарығы – мемлекеттік қаржының орнықтылығының және бәсекелестік шарттарда инвестициялар тарту қабілетінің негізі. Осы Нұсқау халықаралық инвесторларға қазақстандық борыштық құралдар туралы объективті және құрылымдық ақпарат ұсынады. Қаржы министрлігі нарықты тереңдету және инвесторлар базасын кеңейту бағытын дәйекті түрде іске асыруда».
АХҚО: халықаралық капитал тартудың құралы
АХҚО басқарушысы Ренат Бектұров нұсқаудың инвестициялық тартымдылықты арттырудағы рөлін атап өтті.
«АХҚО әлемдік деңгейдегі қаржы алаңы ретінде құрылды және облигациялар нарығын дамыту біздің негізгі басымдықтарымыздың бірі болып табылады. Нұсқауға АХҚО-ның құқықтық және нарықтық инфрақұрылымы туралы жеке тарау енгізу жаһандық инвесторларға біздің юрисдикция арқылы жұмыстың артықшылықтарын толық көлемде бағалауға мүмкіндік береді. Біз бұл жарияланым қазақстандық нарыққа халықаралық капиталды тартудың тиімді құралына айналатынына сенімдіміз».
АДБ: Қазақстанның рөлі артып келеді
Азия даму банкінің Қазақстандағы өкілдігі де бұл құжаттың маңызын атап өтті.
«АДБ Қазақстанды ASEAN+3 форумының жұмысы шеңберінде осы Нұсқауды дайындауда қолдауға қуанышты. Жарияланым Қазақстанның өңірлік қаржылық ықпалдасудағы күннен күнге өсіп келе жатқан рөлін және оның экономикалық дамуды қолдау үшін халықаралық капитал тартуға ұмтылысының айғағы. Біз Нұсқау Қазақстанды салымдар үшін объект ретінде қарастыратын инвесторлар мен нарыққа қатысушылар үшін құнды құрал болатынына сенімдіміз».
