Қаржылық мониторинг агенттігі дәрілік препараттарды сатып алу кезінде мемлекетке ірі көлемде залал келтіру фактісі бойынша тергеу жұмысын аяқтады, деп хабарлайды DKNews.kz.
Дистрибьюторлық схема және жалған мәмілелер
Тергеу материалдарына сәйкес, «Интерфармсервис» ЖШС Қазақстан аумағында Дюшенн бұлшықет дистрофиясын емдеуге арналған дәрілік заттардың жалғыз жеткізушісі ретінде бес жыл бойы медициналық ұйымдарды қамтамасыз етіп келген.
Аталған препараттар бойынша өндіруші шекті сату бағаларын белгілегенімен, компания басшылығы заңсыз пайда табу мақсатында жеткізу тізбегіне шетелде тіркелген, өздеріне бағынысты құрылымды енгізген.
Осы арқылы:
- жалған мәмілелер жасалған
- дәрілердің сату бағасы жасанды түрде көтерілген
- нақты өзіндік құны жасырылған
Мемлекетке миллиардтаған шығын келтірілген
Тергеу нәтижесінде:
- мемлекетке 3,7 млрд теңге көлемінде залал келтірілген
- 4 млрд теңгеден астам қаражат заңсыз қолма-қол ақшаға айналдырылған
- 637 млн теңгеден астам салық төлеуден жалтару фактісі анықталған
Қаражатты жылыстату схемасы
Заңсыз табысты жасыру мақсатында компания басшылығы түрлі жеке кәсіпкерлермен жалған мәмілелер жасап, жалған шот-фактуралар арқылы қаражат айналымын ұйымдастырған.
Бұл схема арқылы алынған қаражат кейін жеке активтерге бағытталған.
Қымбат мүлікке тыйым салынды
Заңсыз табыс есебінен:
- 32 пәтер
- 11 автокөлік
- 8 тұрғын үй
сатып алынғаны анықталды. Аталған мүлікке тәркілеу мақсатында тыйым салынды.
Бұлтартпау шаралары қолданылды
Іс аясында:
- екі күдіктіге үйқамақ
- бір тұлғаға кепіл түріндегі бұлтартпау шарасы
тағайындалған.
Қазіргі уақытта күдіктілер іс материалдарымен танысуда.
Қылмыстық іс бойынша өзге мәліметтер жария етуге жатпайды.
