Мемлекет басшысы Қасым-Жомарт Тоқаев қазақстандықтарды 7 мамыр – Отан қорғаушы күнімен құттықтады, деп хабарлайды DKNews.kz.
Президент бұл мерекенің мемлекеттік әрі қоғамдық маңызы ерекше екенін атап өтіп, ел қауіпсіздігін қамтамасыз етіп жүрген азаматтарға алғыс білдірді.
Президент әскери қызметкерлердің еңбегін атап өтті
Қасым-Жомарт Тоқаев өз құттықтауында жауынгерлердің ерлігі мен кәсіби дайындығына ерекше тоқталды.
«Мемлекеттік әрі қоғамдық маңызы айрықша мерекеде жауынгерлеріміздің ерен ерлігі, мықты рухы мен қайтпас қайсарлығы кеңінен дәріптеледі. Бұл – Қазақстанның қауіпсіздігін, тұрақтылығы мен тыныштығын күндіз-түні қас қақпай күзеткен, сондай-ақ қазір Отан алдындағы борышын адал өтеп жатқан барша азаматқа құрмет көрсетілетін күн», – деді Президент.
Мемлекет басшысы сардарлар мен сарбаздардың бітімгерлік миссиялар мен халықаралық жарыстардағы кәсіби шеберлігі Қазақстан армиясының әлеуетін көрсететінін айтты.
«Қуатты әскеріміз ең күрделі міндеттерді орындауға дайын»
Президенттің сөзінше, мемлекет қорғаныс қабілетін күшейтуге және әскери қызметшілердің әлеуметтік жағдайын жақсартуға ерекше көңіл бөледі.
«Қуатты әскеріміз ең күрделі міндеттерді орындауға қашанда дайын екені сөзсіз. Сондықтан, мемлекет еліміздің қорғаныс қабілетін күшейтуге және әскери қызметшілердің әлеуметтік жағдайын жақсартуға әрдайым баса мән береді», – деді Қасым-Жомарт Тоқаев.
Президент Конституциядағы маңызды қағиданы еске салды
Мемлекет басшысы Конституцияда көрсетілген Отан қорғау міндеті ел азаматтарының ортақ жауапкершілігі екенін атап өтті.
«Жаңа Конституцияда “Қазақстан Республикасын қорғау – оның әр азаматының қасиетті парызы мен міндеті” деп жазылды. Осы аса маңызды тұжырым мемлекет пен халықтың тығыз байланысын, ел тағдырына әрбір отандасымыздың жауапты екенін аңғартады», – деді Президент.
Тоқаев Отан қорғаушыларға алғыс айтты
Қасым-Жомарт Тоқаев әскери антқа адал қызмет етіп жүрген азаматтарға ризашылығын білдірді.
«Антына адал болып, табандылық танытып, мінсіз қызмет етіп жүрген Отан қорғаушыларымызға алғыс айтамын», – деді Мемлекет басшысы.
Сондай-ақ Президент қазақстандықтарға денсаулық, амандық және табыс тіледі.
