10 мамырда Қазақстанда негізгі ҰБТ-2026 ресми түрде басталды. Биылғы тестілеу 10 шілдеге дейін жалғасады, деп хабарлайды DKNews.kz.
Ұлттық тестілеу орталығының мәліметінше, екі мүмкіндікті есепке алғанда тестілеуге қатысу үшін 446 мыңнан астам өтініш қабылданған. Жалпы саны 240 мыңға жуық талапкер ҰБТ тапсырады.
Түлектердің басым бөлігі тесті қазақ тілінде таңдаған.
Талапкерлердің 74 пайызы қазақ тілінде тапсырады
Биыл тест тапсырушылардың:
- 74%-ы қазақ тілінде
- 26%-ға жуығы орыс тілінде
- 851 адам ағылшын тілінде
ҰБТ-ға өтініш берген.
Талапкерлер тестілеу күнін, уақытын және тапсыру орнын өздері таңдаған.
ҰБТ-ның алғашқы күні ел бойынша 926 адам тест тапсырады. Оның ішінде 359 талапкер Астанада емтиханнан өтеді. Жалпы республика бойынша 45 тестілеу пункті жұмыс істейді.
Ең танымал пән комбинациясы өзгерген жоқ
Ұлттық тестілеу орталығының директоры Нұрсейіт Байжановтың айтуынша, бірнеше жыл қатарынан ең көп таңдалған бағыт — «Математика-Физика».
«Бірнеше жыл қатарынан ең көп таңдалған бейіндік пәндер комбинациясы «Математика-Физика» болып қалып отыр – оны түлектердің 17,9%-ы таңдады. Бұл талапкерлердің инженерлер, мұғалімдер, энергетиктер, құрылысшылар және басқа да техникалық мамандықтарға деген ұмтылысын көрсетеді. Танымалдығы бойынша келесі комбинациялар: болашақ медиктерге бағытталған «Биология-Химия» комбинациясы (14,5%) және шығармашылық бағытқа қызығушылық танытқан талапкерлерді тартатын «Шығармашылық емтихан» комбинациясы (12,4%)»
Бұл көрсеткіштер Қазақстанда техникалық және медициналық мамандықтарға қызығушылықтың әлі де жоғары екенін аңғартады.
ҰБТ форматы өзгеріссіз қалды
2026 жылғы ҰБТ форматына өзгеріс енгізілген жоқ.
Талапкерлер:
- 3 міндетті пән
- 2 бейіндік пән
тапсырады.
Жалпы тапсырма саны — 120.
Оның ішінде:
- «Қазақстан тарихы» — 20 сұрақ
- «Оқу сауаттылығы» — 10 сұрақ
- «Математикалық сауаттылық» — 10 сұрақ
- әр бейіндік пәннен — 40 сұрақ
Ең жоғары балл — 140.
Тестілеу уақыты 4 сағатты құрайды. Ерекше білім беру қажеттіліктері бар талапкерлер үшін қосымша 40 минут сақталған.
Апелляция мен қауіпсіздікке ерекше назар аударылады
Талапкерлер тест аяқталғаннан кейін 30 минут ішінде апелляцияға өтініш бере алады.
Апелляция нәтижесі шыққаннан кейін сертификат талапкердің жеке кабинетінде жарияланады. Өтінішті комиссия отырысына дейін қайтарып алу мүмкіндігі де бар.
ҰБТ кезінде қауіпсіздік шаралары күшейтілген.
Тестілеу пункттерінде:
- қол және рамалық металл іздегіштер
- байланыс сигналдарын басатын құрылғылар
- бейнебақылау жүйелері
қолданылады.
Ұлттық тестілеу орталығы 2026 жылғы ҰБТ аяқталғаннан кейін 31 қазанға дейін бейнежазбаларды тексеретінін хабарлады.
Ереже бұзу фактілері анықталған жағдайда талапкердің нәтижесі жойылады. Егер грант иегері атанған болса, білім беру гранты да күшін жояды.
Шекті баллдар өзгерген жоқ
Биыл да шекті баллдар бұрынғы деңгейде қалды.
Негізгі талаптар:
- ұлттық ЖОО-ларға — 65 балл
- басқа ЖОО-ларға — 50 балл
- «Педагогикалық ғылымдар» — 75 балл
- «Денсаулық сақтау» — 70 балл
- «Құқық» бағыты — 75 балл
Сонымен қатар әр пән бойынша минималды межені жинау міндетті.
