Түлкібас ауданында алғаш рет ұйымдастырылған «Түркібасы – айбыным, «Шынар бастау» – айдыным» атты республикалық жастар шығармашылық байқауы өз мәресіне жетті. Байқау жеңімпаздарын марапаттау рәсімі «Шынар бастау» мәдени-рухани демалыс кешенінде өтті, деп хабарлайды DKNews.kz.
Іс-шараға мемлекет және қоғам қайраткерлері, БАҚ өкілдері, ғалымдар мен аудан тұрғындары қатысты.
Байқаудың басты мақсаты қандай
Жоба Түлкібас өңірінің тарихи-мәдени мұрасын, табиғи ерекшелігін және туристік әлеуетін кеңінен насихаттауға бағытталған.
Ұйымдастырушылардың айтуынша, байқау арқылы:
- туған жер тарихын дәріптеу;
- ана тақырыбын насихаттау;
- отбасылық құндылықтарды ұлықтау;
- тарихи тұлғалардың өнегелі өмірін жастарға таныту көзделген.
Байқаудың бас демеушісі — Шерхан Мұртаза атындағы қайырымдылық қордың президенті, саясаттану ғылымдарының докторы Қайрат Айтбай.
Ал жоба идеясының авторы — белгілі медиа және коммуникация маманы, қоғам қайраткері Жандар Асан.
Түлкібас тарихы мен тұлғалары кеңінен қамтылды
Жандар Асан байқаудың негізгі бағыты туралы айтып өтті.
— Байқаудың басты мақсаты – Түлкібас өңірінің тарихы мен бүгінгі жеткен жетістігін, аймақтың туристік әлеуетін дәріптеу, аудандағы қасиетті орындардың бірі – «Шынар бастау» мәдени-рухани кешенінің ерекшелігі мен ана тақырыбын және Тұрар Рысқұлов, Бауыржан Момышұлы, Шерхан Мұртаза, Мекемтас Мырзахметұлы, Мархабат Байғұт сынды тұлғалардың өнегелі өмір жолдарын өскелең ұрпақ арасында насихаттау, – деді ол.
Биылғы байқауға еліміздің түкпір-түкпірінен 90-ға жуық шығарма келіп түскен.
Ұсынылған жұмыстар:
- Түлкібас тарихы;
- өңірдің даму келешегі;
- туристік нысандар;
- «Шынар бастау» кешенінің ерекшелігі;
- ананы құрметтеу тақырыбы;
- тарихи тұлғалардың тағылымы бағыттарын қамтыған.
Бас жүлдені мектеп оқушысы жеңіп алды
Байқау комиссиясының құрамында отандық БАҚ басшылары, тіл мамандары мен танымал журналистер болды.
Нәтижесінде бас жүлде Асанбай Асқаров атындағы жалпы білім беретін мектептің 10-сынып оқушысы Ақнұр Құралбекке бұйырды.
Жүлделі орындар төмендегідей бөлінді:
- І орын — «Шамшырақ» қоғамдық-саяси газетінің тілшісі Аяжан Мәмет;
- ІІ орын — жас жазушы Гүлсая Рүстем және мұғалім Сандуғаш Аяғанова;
- ІІІ орын — Айгерім Пірімжан, Жансая Бектеналы және Нұргүл Қадырбай.
Жеңімпаздар мен жүлдегерлерге Шерхан Мұртаза атындағы қайырымдылық қордың арнайы сыйақылары табысталды.
Үздік шығармалар жинақ болып шығады
Ұйымдастырушылардың мәліметінше, байқауда үздік деп танылған шығармалар республикалық және өңірлік БАҚ-та жарияланады.
Сонымен қатар барлық туындылар арнайы жинаққа енгізілмек.
Жоба алдағы уақытта дәстүрлі түрде жыл сайын өткізіліп тұрады деп жоспарланып отыр.
