Павлодар облысында жылдар бойы тұрғындарды әбігерге салған коммуналдық мәселелерді шешуге бағытталған ірі жаңғырту басталды.
Әсіресе қыс мезгілінде жиі сын көтермейтін жылу желілері мен тозған инфрақұрылым енді кезең-кезеңімен ауыстырылмақ. 2026-2027 жылдары өңірдің үш қаласында энергетикалық және коммуналдық секторды жаңғыртуға 13,6 миллиард теңге бөлінеді, деп хабарлайды DKNews.kz.
Бұл тек құбыр ауыстыру емес. Билік енді «жөндей салу» тәсілінен бас тартып, болашақтағы жүктемені көтере алатын жаңа жүйе құруға көшкендей.
Екібастұз бен Ақсу «қол қусырып отырмайды»
Соңғы жылдары Павлодар облысындағы коммуналдық апаттар жұрттың есінде жақсы сақталды. Әсіресе Екібастұздағы жылу дағдарысы ел көлемінде үлкен резонанс тудырған еді. Сол себепті бүгінде бұл қалада жылу жүйесін жаңарту негізгі мәселеге айналды.
Қазір «Екібастұз жылу желілері» компаниясы қаланың желілік инфрақұрылымын қайта жаңғыртуға кіріскен. Сонымен қатар «Горводоканал» сорғы станцияларын жөндеуді жоспарлап отыр. Бұл – тек апаттардың алдын алу емес, су мен жылу қысымын тұрақтандыру үшін де маңызды.
Ал Ақсуда «Теплосервис-Ақсу» кәсіпорны магистральдық және тарату желілерін кезең-кезеңімен ауыстырмақ. Көптеген құбырлар ондаған жыл бұрын салынғандықтан, олардың тозуы қалыпты жағдайға айналған.
Сарапшылардың айтуынша, ескі желілердегі басты мәселе – жылу шығынының өте жоғары болуы. Қарапайым тілмен айтқанда, қазандықтан шыққан жылудың бір бөлігі тұрғын үйге жеткенше далаға кетеді.
Павлодарда жаңа нысандар салынады
Облыс орталығы да ауқымды жаңғырту жұмыстарынан тыс қалмайды. Павлодарда 2026-2027 жылдары жеті ірі жоба іске асады.
Олардың ішінде:
- сорғы станциясының құрылысы;
- жылу магистралін жөндеу;
- орталық жылу пункттерін жаңарту бар.
Сонымен қатар «Павлодар тарату компаниясы» электр желілерін де жаңартуды жоспарлап отыр. Жоба аясында:
- жаңа әуе желілері салынады;
- трансформаторлық қосалқы станциялар жаңартылады;
- электр энергиясын есептеудің автоматтандырылған жүйесі енгізіледі.
Мұндай жүйе электр шығынын азайтып қана қоймай, апаттарды тез анықтауға мүмкіндік береді.
13,6 миллиард теңге қалай бөлінеді?
Алдын ала есеп бойынша:
- Павлодарға – 5,8 млрд теңге;
- Екібастұзға – 5,2 млрд теңге;
- Ақсуға – 2,6 млрд теңге бағытталады.
Жалпы өңір бойынша оннан астам жоба жүзеге асады. Бірақ бұл соңғы тізім емес. Мамандар қажет болған жағдайда жобалар саны артуы мүмкін екенін айтады.
Павлодар облысының энергетика және ТКШ басқармасының басшысы Ержан Иманзаиповтың сөзінше, мәселе тек ескі инфрақұрылымды жөндеуде емес.
«Кәсіпорындарға инфрақұрылымды күрделі жөндеуден өткізіп қана қоймай, бірінші кезекте жылу беру сапасын арттырып, жаңа тұтынушыларды қосу үшін қуат қорын құруға тура келеді», – деді ол.
Яғни өңірде тек қазіргі мәселе шешілмейді, болашақтағы құрылыс пен халық санының өсуі де ескеріліп отыр.
Бұған дейін не істелді?
Павлодар облысында алғашқы ірі жобалардың бірі 2025 жылдың соңында аяқталған болатын. Сол кезде Павлодарда ЖМ-20А жаңа жылу магистралі пайдалануға берілді.
Ұзындығы 6 шақырымнан асатын жаңа желі ЖЭО-1-ден басталып, Ломов көшесі арқылы өтеді. Жобаның құны 9,7 миллиард теңгені құрады.
Ең маңыздысы – бұл магистраль 1972 жылдан бері қолданылып келген ескі жүйенің жүктемесін азайтты. Нәтижесінде:
- 600 тұрғын үй тұрақты жылумен қамтылды;
- жылу шығыны азайды;
- апат қаупі төмендеді.
Мамандардың айтуынша, жаңа материалдардың арқасында желінің әлсіз тұстары айтарлықтай қысқарған.
Коммуналдық жүйе неге дәл қазір жаңартылып жатыр?
Қазақстанның көптеген қаласында инженерлік желілердің тозу деңгейі 60-70 пайызға дейін жеткен. Павлодар облысы да бұл мәселеден тыс емес.
Қыста болатын ірі апаттар, құбыр жарылыстары мен жылусыз қалған үйлер мемлекетке бір нәрсені анық көрсетті: ескі жүйені «жамаумен» мәселе шешілмейді.
Сондықтан қазір өңірлерде коммуналдық инфрақұрылымды толық жаңғыртуға басымдық беріліп жатыр.
Ал Павлодар облысындағы бұл жобалар алдағы бірнеше жылда тұрғындардың қысқы өмір сапасына тікелей әсер ететін негізгі өзгерістердің біріне айналуы мүмкін.
