ҚМА Шымкент қаласы бойынша департаменті «Капитал» атауымен инвестициялық платформа ретінде жасырын әрекет еткен қаржы пирамидасын ұйымдастыру фактісі бойынша тергеп-тексеру жүргізіп жатыр, деп хабарлайды DKNews.kz.
Ведомство мәліметінше, күдікті азаматтарды әлеуметтік желілер арқылы тартқан.
Салымшыларға жоғары табыс уәде етілген
Тергеу деректеріне сәйкес, азаматтардан 20 000 теңгеден 500 000 теңгеге дейін қаражат қабылданған.
Оларға 3–5 күн ішінде салым сомасының 30–50%-ына дейін табыс табуға болатыны айтылған.
Жаңа қатысушыларды тарту үшін:
- «жылдам табыс» туралы уәделер
- уақытпен шектелген ұсыныстар
- психологиялық әсер ету тәсілдері
қолданылған.
ҚМА мәліметінше, мұндай тәсілдер азаматтарды қаржылық тәуекелдерді толық бағаламай шешім қабылдауға итермелеген.
Нақты кепілдік болмаған
Уәде етілген табысқа кепілдіктер тек ауызша берілген.
Олар:
- нақты кәсіпкерлік қызметпен
- шарттық міндеттемелермен
- заңды инвестициялық құралдармен
қамтамасыз етілмеген.
Тергеу нұсқасы бойынша салымшыларға төлемдер жаңа қатысушылардан түскен қаражат есебінен жүргізілген.
900-ден астам адам тартылған
Қаржы пирамидасына 900-ден астам салымшы тартылған.
Жалпы салынған қаражат көлемі 700 млн теңгеден асқан.
Қазіргі уақытта тергеп-тексеру жалғасып жатыр.
Қазақстан Республикасының Қылмыстық-процестік кодексінің 201-бабына сәйкес өзге ақпарат жариялауға жатпайды.
ҚМА азаматтарға ескерту жасады
Қаржылық мониторинг агенттігі азаматтарды қысқа мерзімде жоғары табыс уәде ететін күмәнді жобалардан сақ болуға шақырды.
Мамандар инвестиция жасамас бұрын:
- ұйым қызметінің заңдылығын
- тиісті рұқсат құжаттарының бар-жоғын
- табыс кепілдігінің нақты негізін
мұқият тексеру қажет екенін ескертеді.
