Қазақстанда мамыр айының төртінші жексенбісі ерекше мамандық иелеріне арналады.
Бұл күні Қарулы күштердің мәдениет және өнер қызметкерлері кәсіби мерекесін атап өтеді. Көпшілік әскери қызметті қару-жарақпен, саптық дайындықпен немесе жаттығулармен байланыстырады, деп хабарлайды DKNews.kz.
Бірақ армияның рухын көтеріп, сарбаздың бойына елге деген сенім мен намысты сіңіретін тағы бір үлкен күш бар. Ол – әскери мәдениет.
Бүгінде Қазақстан армиясындағы мәдениет саласы тек концерт ұйымдастырумен немесе мерекелік шаралар өткізумен шектелмейді. Бұл – тарихи жадыны сақтайтын, жас ұрпаққа патриоттық тәрбие беретін, әскери дәстүрді жалғайтын тұтас идеологиялық алаңға айналды.
Әскер тарихын сөйлеткен музейлер
Қазақстан Қарулы күштеріндегі басты мәдени орталық – Ұлттық әскери-патриоттық орталық. Бұл құрылым бүгінде армияның рухани тірегіне айналған деуге болады. Оның құрамындағы Астанадағы Әскери-тарихи музей, Алматыдағы Даңқ музейі және Ақмола облысының Родина ауылында жақында ашылған музей кешені әскери тарихты жаңа форматта таныстырып келеді.
Қазір бұл музейлерде 50 мыңнан астам жәдігер сақтаулы. Олардың арасында майданнан жеткен хаттар, сирек фотосуреттер, тарихи қарулар мен батырлар қолданған жеке заттар бар. Мұндай дүниелер құрғақ ақпараттан әлдеқайда әсерлі. Себебі келуші тарихты көзбен көріп, эмоция арқылы қабылдайды.
Соңғы жылдары әскери музейлерге қызығушылық артқан. Мұнда тек әскери қызметкерлер ғана емес, оқушылар, студенттер, шетелдік туристер де жиі келеді. Бұл қоғамда әскери тарихқа деген сұраныстың өсіп жатқанын көрсетеді.
«Жас сарбаз»: патриотизмнің жаңа буыны
Қазіргі балалардың назарын бір нәрсеге аудару оңай емес. Смартфон мен әлеуметтік желі заманында патриоттық тәрбиені де жаңа тәсілмен беру қажет. Осы бағытта «Жас сарбаз» қозғалысы ерекше рөл атқарып отыр.
Бүгінде ұйым құрамында 280 мыңнан астам бала мен жасөспірім бар. Олар әскери-патриоттық клубтарда, арнайы сыныптарда және Smart Sarbaz үйірмелерінде алғашқы әскери дайындықты меңгереді. Бірақ бұл жерде басты мақсат – балаларды әскерге дайындау ғана емес. Ең маңыздысы – тәртіпке, жауапкершілікке және елге қызмет ету идеясын қалыптастыру.
Жыл сайын өтетін халықаралық «Айбын» жиыны да жастар арасында ерекше танымал. Бұл жарыста жасөспірімдер тек физикалық дайындықтарын емес, көшбасшылық қабілеттерін, командалық рухын көрсетеді. Көпшілік үшін бұл әскери лагерь емес, өзін сынайтын үлкен өмір мектебі.
Домбыра мен әскери тәртіп қатар жүреді
Әскердегі мәдениет дегенде көп адам әскери оркестрді ғана елестетеді. Бірақ бүгінде Қарулы күштер жанындағы шығармашылық бағыт әлдеқайда кеңейді.
Әскери қызметшілердің балалары вокал, би, домбыра үйірмелеріне қатысып, республикалық және халықаралық байқауларда жүлде алып жүр. Бұл – армия тек қатаң тәртіптің емес, талантты қолдайтын ортаның да бір бөлігі екенін көрсетеді.
Сонымен қатар әскери оркестрлердің қоғамдағы рөлі ерекше. Олар тек ресми шерулерде ғана өнер көрсетпейді. Қалалардағы мерекелік кештерге қатысып, ардагерлердің үйлеріне барып, соғыс куәгерлеріне құрмет көрсетеді. Кейде бір әскери марштың өзі адамдарға үлкен эмоция сыйлайтыны рас.
Өнерпаз сарбаздар: армиядағы жаңа мүмкіндік
Соңғы жылдары Қазақстан армиясында ерекше жоба іске қосылды. Ұлттық әскери-патриоттық орталық жанынан өнерпаз сарбаздардан құралған шығармашылық взвод жұмыс істейді.
Бұл жоба талантты жастарға әскерде жүріп шығармашылығын дамытуға мүмкіндік береді. Олар концерттерге қатысып, мәдени шараларда өнер көрсетеді. Қызметтен кейін де бұл сарбаздардың алдында жаңа мүмкіндік ашылады: жоғары оқу орындарына жеңілдікпен түсу немесе әскери шығармашылық ұжымдарда келісімшартпен қызмет ету.
Бұрын армия мен өнерді екі бөлек әлем деп қабылдайтындар көп еді. Бірақ қазіргі Қазақстан армиясы бұл түсінікті өзгертіп келеді.
Әскердің мәдени коды не үшін маңызды?
Қару армияны күшейтеді. Бірақ рух болмаса, кез келген күш әлсірейді. Сондықтан әскери мәдениет – жай ғана қосымша бағыт емес, ұлттық қауіпсіздіктің маңызды бөлігі.
Тарихын білетін сарбаз елін басқаша қорғайды. Батырлардың ерлігін көріп өскен бала Отан ұғымын тереңірек түсінеді. Ал өнер мен музыка әскери қызметтің адамдық, рухани қырын ашады.
Бүгінгі Қазақстан армиясы тек әскери қуатымен емес, мәдениетімен де ерекшеленуге ұмтылып отыр. Себебі заманауи әскер – техника мен тәртіп қана емес, ұлттық рухтың айнасы.
