Шымкент гарнизонының әуе шабуылына қарсы қорғаныс бригадасында мерзімді әскери қызметін өткеріп жүрген қатардағы жауынгер Полатбек Теміров әскери міндетін абыроймен атқарып қана қоймай, спорттағы жетістіктерімен де ерекшеленіп келеді, деп хабарлайды DKNews.kz.
Жас сарбаз әскери қызмет пен спортты қатар алып жүріп, табандылық пен тәртіптің жарқын үлгісін көрсетуде.
Спорттағы жетістіктері ерте басталған
Полатбек Теміров 2007 жылғы 17 маусымда Шымкент қаласында дүниеге келген. Мектепті 2023 жылы тәмамдағаннан кейін дене шынықтыру пәнінің мұғалімі мамандығы бойынша колледжге оқуға түсті.
2025 жылдың қараша айында академиялық демалыс алып, мерзімді әскери қызметке шақырылды.
Спортпен ол бала кезінен айналыса бастады. Мектеп жылдарында түрлі спорт секцияларына қатысып, 2022 жылдан бастап пауэрлифтингпен кәсіби түрде шұғылдана бастады. Үздіксіз жаттығу мен қажырлы еңбектің нәтижесінде 2024 жылы спорт шеберлігіне кандидат нормативін орындады.
Азия және әлем чемпионаттарының жүлдегері
Полатбек республикалық және халықаралық жарыстарда жоғары нәтиже көрсетіп келеді.
Оның жетістіктері қатарында:
- 59 келіге дейінгі салмақта Қазақстан чемпионаттарының төрт дүркін күміс жүлдегері
- Қазақстан чемпионаттарының төрт дүркін қола жүлдегері
- 2023 жылғы Азия чемпионатының күміс жүлдегері
- 2024 жылы Мальтада өткен әлем чемпионатының күміс жүлдегері
Жас спортшы өзінің жетістіктеріне жету жолында қолдау көрсеткен жаттықтырушылары Қахраман, Рустам және Ғайрат Садықовтарға ерекше алғысын білдіреді.
Әскер мен спортты қатар алып жүр
Қазіргі таңда Полатбек Теміров әскери қызметін жалғастырып, спорттық дайындығын да тоқтатқан жоқ.
Әскерден запасқа шыққаннан кейін ол оқуын жалғастырып, пауэрлифтингпен кәсіби деңгейде айналысуды жоспарлап отыр. Оның басты мақсаты – әлем чемпионы атанып, Қазақстанның көк туын халықаралық ареналарда биікке көтеру.
Бұл оқиға қазақстандық жастардың әскери қызметті спортпен және жеке дамумен ұштастыра алатынын көрсетеді. Сонымен қатар жас спортшылардың ел намысын қорғаумен қатар, Отан алдындағы борышын да абыроймен атқара алатынын дәлелдейді.
