Премьер-министрдің орынбасары – ұлттық экономика министрі Серік Жұманғарин Арқалық қаласын, Амангелді және Жангелді аудандарын әлеуметтік-экономикалық дамытудың 2026-2028 жылдарға арналған кешенді жоспарын іске асыру мәселелері бойынша кеңес өткізді, деп хабарлайды DKNews.kz.
Құжат Мемлекет басшысы Қасым-Жомарт Тоқаевтың Торғай өңірін кешенді дамыту жөніндегі тапсырмаларын орындау аясында әзірленіп, Үкімет қаулысымен бекітілген.
Жоспар 51 іс-шараны қамтиды
Үш жылдық кешенді жоспар өңірдің экономикалық және әлеуметтік әлеуетін арттыруға бағытталған.
Жоспар аясында:
- өнеркәсіпті дамыту
- көлік инфрақұрылымын жаңғырту
- туризм мен спортты қолдау
- агроөнеркәсіптік кешенді дамыту
- білім беру мен денсаулық сақтауды жетілдіру
- әлеуметтік қорғауды күшейту
- жылу және электрмен жабдықтау жүйелерін жаңарту
- су бұру және азаматтық қауіпсіздік салаларын дамыту
бойынша жұмыстар жүзеге асырылады.
Жалпы алғанда құжат 10 негізгі бағыт пен 51 іс-шараны қамтиды.
Арқалықта ірі инвестициялық жобалар іске асады
Жоспарда ауыл шаруашылығы мен өңдеу өнеркәсібін дамытуға ерекше назар аударылған.
Алдағы жылдары Арқалықта:
- 6 мың бас ірі қараға арналған модульдік репродуктор
- желатин және биоактивті сүйек матрицасын өндіретін зауыт
- 10 мың бас қойға арналған мал шаруашылығы кешені
- 6 мың басқа арналған бордақылау алаңы
- құрама жем зауыты
салынбақ.
Сонымен қатар жылына 300 миллион жұмыртқа өндіретін құс фабрикасын кеңейту және жаңғырту жоспарланып отыр.
Биыл 78,4 миллиард теңгенің жобалары жүзеге асырылады
Қостанай облысының әкімі Құмар Ақсақаловтың айтуынша, 2026 жылы жалпы құны 78,4 миллиард теңгені құрайтын 33 іс-шараны іске асыру көзделген.
Қазіргі таңда бұл мақсаттарға 39,2 миллиард теңге бөлінген.
Облыстық бюджеттен қосымша 8,8 миллиард теңге қарастырылған.
Арқалық әуежайы тамыз айында ашылады
Өңірдегі маңызды жобалардың бірі – Арқалық әуежайын қайта іске қосу.
Құмар Ақсақаловтың айтуынша, жоба толық қаржыландырылған.
«Біз барлығының жоспарлы мерзімде іске асырылуы үшін қажеттінің бәрін жасаймыз. Осы жылы облыстық бюджеттен 8,8 млрд теңге бөлінді. Бұл негізгі жобаларды толық көлемде қаржыландыруға мүмкіндік берді. Олардың ең бастысы — Арқалық әуежайының құрылысы. Бүгінгі күні қаржыландырумен әуеайлақ инфрақұрылымын қайта жаңарту, жолаушылар терминалын салу және қажетті жабдықтарды сатып алу толық қамтамасыз етілді. Жұмыс қатаң түрде кесте бойынша жүргізілуде. Осы жылғы тамызда нысан пайдалануға беріледі. Әуежайды іске қосу әуе қатынасын қалпына келтіріп қана қоймай, көлік қатынасы, инвестициялық тартымдылықты айтарлықтай арттырып, өңірді дамытудың жаңа кезеңін ашады»
Әуежайдың іске қосылуы өңірдің көлік қолжетімділігін жақсартып, жаңа инвестициялар тартуға мүмкіндік береді.
Қала инфрақұрылымы жаңартылып жатыр
Қазіргі уақытта Арқалықта бірқатар абаттандыру жұмыстары жүргізілуде.
Атап айтқанда:
- бос тұрған ғимараттар қалпына келтірілуде
- аулаішілік аумақтар жөнделуде
- вокзал маңындағы алаңдар жаңартылуда
- университет ғимараты қайта жаңғыртылды
- Жезқазған – Арқалық автожолын жөндеу жұмыстары аяқталуға жақын
Бұл жобалар қала тұрғындарының өмір сүру сапасын жақсартуға бағытталған.
Құс фабрикасының қуаты екі есе артады
«Arkalyk QUS» ЖШС құс фабрикасының тең құрылтайшысы Максим Божко кәсіпорынды жаңғырту жоспарын таныстырды.
«Биыл біз 70 млн жұмыртқаға арналған жаңа құс қораларын пайдалануға беруді және өзіміздің құрама жем зауытын салуды жоспарлап отырмыз. Келесі жылы тағы 80 млн дана құс үйі іске қосылады. Екі кезеңді жүзеге асыру қорытындысы бойынша құс фабрикасының қуаты жылына 300 млн жұмыртқаға жетеді. Қазір бізде шамамен 250-270 адам жұмыс істейді. Штатты 370 қызметкерге дейін көбейте отырып, 100-ден астам қосымша жұмыс орнын құруға мүмкіндік бар»
Жобаны іске асыру нәтижесінде өндіріс көлемі жылына 150 миллионнан 300 миллион жұмыртқаға дейін өседі.
Серік Жұманғарин нақты нәтижеге басымдық беруді тапсырды
Кеңес қорытындысында Серік Жұманғарин мемлекеттік органдарға және жергілікті атқарушы билікке жобалардың уақытылы орындалуын қатаң бақылауда ұстауды тапсырды.
Сондай-ақ инвесторларға барлық қажетті қолдау көрсетіліп, жоспарланған бастамалардың нақты жүзеге асуына жағдай жасау қажеттігін атап өтті.
Сарапшылардың пікірінше, Торғай өңірін дамыту жоспары жаңа өндірістер ашуға, жұмыс орындарын көбейтуге және Арқалықтың экономикалық әлеуетін арттыруға мүмкіндік береді.
