Қазақстанда платформалық жұмыспен қамтудың жаңа режимі енгізілгеннен бері, яғни 2026 жылдың басынан бастап 207 мыңнан астам адам Яндекс сервистерімен серіктестік аясында өзін-өзі жұмыспен қамтығандар мәртебесін алды.
Бұл туралы Yandex Qazaqstan компаниясы «Қалалық мобильділікті Қазақстандағы дамыту» форумында мәлімдеді, деп хабарлайды DKNews.kz.
Өзін-өзі жұмыспен қамтудың жаңа режимі Салық кодексі аясында енгізіліп, платформалық жұмыспен қамтылған азаматтар үшін көптеген процесті едәуір жеңілдетті. Енді платформа арқылы жұмыс істеуді бастау үшін орындаушыға қосымша әрекеттер жасаудың қажеті жоқ – барлық процесс автоматты түрде жүзеге асады. Өзін-өзі жұмыспен қамту режиміне тіркелуден бастап әлеуметтік төлемдерді аударуға дейінгі жұмыстар платформа арқылы орындалады.
Yandex Qazaqstan деректеріне сәйкес, 2024 жылдан бері Қазақстанда компания сервистерімен 320 мыңнан астам платформалық орындаушы серіктестік орнатқан. Осы кезеңде платформалық орындаушылар үшін бюджет пен мемлекеттік қорларға 14,9 млрд теңге көлемінде салықтар мен әлеуметтік төлемдер аударылды. Бұл соманы компания салық агенті ретінде міндетті төлемдерді орындаушылардың атынан автоматты түрде есептеп, мемлекетке аударады.
Өзін-өзі жұмыспен қамтығандар мәртебесін алу тікелей платформа арқылы жүзеге асырылады. Құжат тексеруден өткеннен кейін орындаушы алғашқы тапсырысын алады, фискалдық чек түзіледі, содан соң оған қатысты өзін-өзі жұмыспен қамту режимі автоматты түрде рәсімделеді.
«Бүгінде азаматтарға өзін-өзі жұмыспен қамтығандар мәртебесін тікелей платформа арқылы алуға мүмкіндік беретін маңызды тетік іске қосылды. Қазіргі таңда Қазақстандағы жобаны – платформалық жұмыспен қамту саласындағы әлемдегі ең үздік тәжірибелердің бірі деп сеніммен айта аламын. Сонымен қатар мемлекеттік органдар және нарық ойыншыларымен бірлесіп талқылауды қажет ететін мәселелер де бар. Олардың қатарында платформадағы өзін-өзі жұмыспен қамту қызметін кәсіпкерліктің жекелеген режимдерімен қатар жүргізу мүмкіндігі, платформа мен орындаушы арасындағы құжат айналымын жеңілдету, сондай-ақ берешегі бар азаматтарға қатысты рәсімдерді жетілдіру мәселелері бар», – деді Яндекс Go компаниясының платформалық жұмыспен қамту жөніндегі халықаралық бағыт жетекшісі Лидия Мосяга.
Yandex Qazaqstan мәліметінше, жаңа режим өзін-өзі жұмыспен қамтуды тіркеу мен міндетті төлемдерді аудару процестерін толықтай автоматтандыруға мүмкіндік берді. Компания бұл бағыттағы реттеуді одан әрі дамыту аталған механизмді қолдану мүмкіндіктерін кеңейтіп, орындаушылардың цифрлық сервистермен өзара іс-қимылын одан әрі жеңілдетеді деп есептейді.
