Алматыда КазТАГ бас редакторы Амир Касеновқа қатысты бұлтартпау шарасы өзгертілді. Бұған оның үйқамақ талаптарын бірнеше рет бұзуы себеп болған. Енді ол үйқамақта емес, күзетпен ұсталады.
Алматы қаласының Алмалы аудандық сотында КазТАГ бас редакторы Амир Касенов, агенттіктің бас директоры Асет Матаев және басқа да тұлғаларға қатысты қылмыстық істі қарау жалғасып жатыр. Қоғам назарын аударған бұл процесс енді жаңа шешіммен жалғасты - сот айыпталушылардың бірі Амир Касеновқа қатысты бұлтартпау шарасын өзгертті.
Сот отырысы барысында мемлекеттік айыптаушы Касеновқа қатысты үйқамақ түріндегі бұлтартпау шарасын күзетпен ұстауға ауыстыру туралы өтінішхат берді. Прокурордың ұстанымынша, айыпталушы бұған дейін сот белгілеген шектеулерді бірнеше рет бұзған.
Іс материалдарына сәйкес, 2025 жылғы 24 желтоқсандағы сот қаулысымен Амир Касеновқа үйқамақ түріндегі бұлтартпау шарасы санкцияланған. Бұл шешім бойынша оған әлеуметтік желілер мен интернетті пайдалануға, кез келген хат-хабарды алуға және жіберуге, сондай-ақ интернет, ұялы байланыс және қалалық телефонды қоса алғанда, кез келген байланыс құралдары арқылы сөйлесуге және хат алмасуға тыйым салынған.
Кейін 2026 жылғы 5 маусымда қылмыстық іс сот өндірісіне қабылданып, басты сот талқылауы тағайындалған кезде бұрын таңдалған бұлтартпау шарасы өзгеріссіз қалдырылған. Яғни үйқамаққа қатысты барлық талаптар сол күйінде күшінде болған.
Алайда сотта келтірілген деректерге сәйкес, 2026 жылғы 2 маусымда Амир Касенов бұқаралық ақпарат құралының парақшасында қаралып жатқан қылмыстық іске қатысты жеке бейнеүндеу жариялаған. Сот мұны үйқамақ талаптарын бұзу деп бағалады.
Бұдан бөлек, 2026 жылғы 15 маусымда интернет-ресурстарда оның қылмыстық іс бойынша медиация мәселесіне қатысты тағы бір жеке бейнеүндеуі жарияланғаны айтылды. Бұл да бұрын белгіленген шектеулерге қайшы әрекет ретінде қаралған.
Сот назар аударған тағы бір жайт - Касеновтың басты сот талқылауына келмеуі. Ол 2026 жылғы 11 маусымда сағат 10:00-де өтетін сот отырысы туралы тиісті түрде хабарланғанына қарамастан, процеске қатыспаған. Осылайша, соттың алғашқы шақыруы бойынша келу міндетін орындамаған.
Тараптардың пікірлерін тыңдап, ұсынылған материалдарды зерттегеннен кейін сот мемлекеттік айыптаушының өтінішхатын қанағаттандыруға негіз бар деген қорытындыға келді.
Сот қаулысымен Амир Касеновқа қатысты бұлтартпау шарасы үйқамақтан күзетпен ұстауға өзгертілді.
Келесі сот отырысы 22 маусым сағат 10:00-ге тағайындалды.
Қылмыстық іс бойынша сот талқылауы жалғасып жатыр. Айыпталушылардың кінәсі соттың заңды күшіне енген үкімімен ғана дәлелденеді.
