Атырауда пластик қалдықтарын қайта өңдеуге бағытталған жаңа өндіріс жобасы жүзеге асырылып жатыр. «Фибратекс» ЖШС ПЭТ-бөтелкелерді қайта өңдеп, полиэфирлі штапель талшығын өндіретін заманауи кәсіпорын ашуды қолға алды, деп хабарлайды DKNews.kz.
Жоба өңірдің өнеркәсіптік әлеуетін арттырып қана қоймай, қалдықтарды қайта өңдеу көлемін көбейтуге және жаңа жұмыс орындарын ашуға мүмкіндік береді.
Пластик қалдықтары жаңа өнімге айналады
Кәсіпорында пайдаланылған ПЭТ-бөтелкелер толық өңдеу циклінен өтеді.
Өндіріс үш кезеңнен тұрады:
- пластик бөтелкелерді сұрыптау және тазалау;
- флекс өндіру;
- флексті полиэфирлі штапель талшығына қайта өңдеу.
Дайын өнім кәсіпорынның геосинтетикалық материалдар өндірісінде қолданылып, кейін шетел нарықтарына экспортталады.
Жобаның негізгі көрсеткіштері
Жаңа өндіріс іске қосылғаннан кейін:
- тәулігіне 20 тоннаға дейін пластик қалдығы қайта өңделеді;
- жылына 7 мың тоннаға дейін полиэфирлі штапель талшығы өндіріледі;
- 67 тұрақты жұмыс орны ашылады;
- өңірдің экспорттық әлеуеті артады.
Бұл жоба қалдықтарды тиімді пайдалануға негізделген өндірістің жаңа үлгісін қалыптастыруға бағытталған.
Айналмалы экономиканы дамытуға үлес қосады
Мамандардың айтуынша, жоба айналмалы экономика қағидаттарын іс жүзінде енгізудің жарқын мысалы болмақ.
Пайдаланылған пластик қалдықтары қайта өңделіп, жоғары сұранысқа ие өнеркәсіптік шикізатқа айналады. Бұл бір жағынан қоршаған ортаға түсетін жүктемені азайтса, екінші жағынан жаңа экспорттық өнім шығаруға мүмкіндік береді.
Заманауи технологияларды пайдалану экологиялық және экономикалық міндеттерді қатар шешуге жол ашады.
Жоба «Жасыл даму» қолдауымен жүзеге асырылуда
Инвестициялық жоба өндірушілердің кеңейтілген міндеттемелері тетігі аясында жиналған қаражат есебінен «Жасыл даму» АҚ қолдауымен жүзеге асырылып жатыр.
Жобаның іске қосылуы Қазақстанда қалдықтарды қайта өңдеу саласын дамытуға, экологиялық өндірістердің үлесін арттыруға және өңір экономикасын әртараптандыруға ықпал етеді.
