Премьер-министр Олжас Бектеновтің гидротехникалық нысандардың жай-күйін бақылауда ұстау және трансшекаралық өзендердегі қауіптердің алдын алу жөніндегі тапсырмасы аясында Су ресурстары және ирригация министрі Нұржан Нұржігітов Алматы облысына жұмыс сапарымен барды, деп хабарлайды DKNews.kz.
Сапар барысында министр өңірдегі негізгі су шаруашылығы нысандарының жұмысымен танысып, жүзеге асырылып жатқан инфрақұрылымдық жобалардың барысын тексерді.
Күрті су қоймасы жаңғыртылады
Іле ауданында министр сыйымдылығы 120 миллион текше метр болатын Күрті су қоймасының жұмысын көрді.
Бұл нысан:
- Іле және Жамбыл аудандарындағы;
- 13,7 мың гектар суармалы жерді сумен қамтамасыз етеді.
Қазіргі уақытта:
- Күрті су қоймасы бөгетін қайта жаңғыртуға арналған жобалық құжат әзірленуде;
- секундына 309 текше метр су өткізе алатын Тасқұтан су көтергіш бөгетін реконструкциялау жобасы дайындалуда.
Сонымен қатар Ислам даму банкімен бірлескен жобаның екінші кезеңі аясында 2027 жылы жалпы ұзындығы 62,3 шақырым болатын Күрті өзенінің оң және сол жағалау магистральдық каналдарын қайта жаңғырту басталады.
Бартоғай су қоймасында автоматтандыру енгізіледі
Еңбекшіқазақ ауданында министр Шелек өзеніндегі Бартоғай су қоймасының жұмысымен танысты.
Жоба аясында:
- бөгет нығайтылады;
- су деңгейін тәулік бойы бақылау жүйесі енгізіледі;
- қақпаларды басқару автоматтандырылады;
- жергілікті ескерту жүйесі орнатылады;
- жаңа инфрақұрылым салынады.
Бартоғай су қоймасы:
- Еңбекшіқазақ;
- Қарасай;
- Талғар аудандарындағы 66,3 мың гектар суармалы алқапты сумен қамтамасыз етеді.
Нысанның жобалық сыйымдылығы – 320 миллион текше метр.
Үлкен Алматы каналы кезең-кезеңімен жаңғыртылып жатыр
Министр Д. Қонаев атындағы Үлкен Алматы каналының қайта жаңғыртылған учаскелерін де аралады.
Атқарылған жұмыстар нәтижесінде:
- ұзындығы 1,53 шақырым учаске толық темірбетонмен қапталды;
- каналдың техникалық жағдайы жақсарды;
- су өткізу қабілеті артты;
- су шығыны азайды.
Бұл жұмыстар 33,3 мың гектар суармалы жердің сумен қамтылуын жақсартуға мүмкіндік берді.
Қазіргі уақытта:
- ұзындығы 15,5 шақырым болатын учаскені қайта жаңғырту жобасы толық әзірленді;
- жалпы ұзындығы 110 шақырым учаскені реконструкциялауға арналған құжат дайындалуда.
Балтабайдағы ирригациялық жоба аяқталуға жақын
Министр Балтабай суару алқабындағы жұмыстармен де танысты.
Ирригация және дренаж жүйелерін жетілдіру жобасының екінші кезеңі аясында құрылыс-монтаж жұмыстарының 94 пайызы орындалған.
Министр су шаруашылығы қызметкерлерімен кездесті
Жұмыс сапары соңында Нұржан Нұржігітов «Қазсушар» РМК-ның «Д. Қонаев атындағы Үлкен Алматы каналы» филиалының ұжымымен кездесті.
Министр сала қызметкерлерін алдағы Су шаруашылығы қызметкерлері күнімен құттықтап, әлеуметтік қолдау шаралары туралы айтты.
«Премьер-министр министрлікке гидротехникалық нысандардың жай-күйін тұрақты бақылауда ұстауды, сондай-ақ трансшекаралық өзендердегі су шығыны мен туындауы мүмкін қауіптер туралы мәліметтермен үздіксіз алмасуды ұйымдастыруды тапсырды. Д. Қонаев атындағы Үлкен Алматы каналы филиалының нысандары Алматы облысының су шаруашылығы жүйесінің негізі. Сол себепті барлық жобаның сапалы әрі уақытылы іске асырылуын қамтамасыз ету қажет. Министрлік суды тиімді пайдалану, ауыл шаруашылығын дамыту және өңірдегі елді мекендердің қауіпсіздігін қамтамасыз етуге бағытталған бұл жұмыстардың орындалуын ерекше бақылауда ұстайды».
Бұл неге маңызды?
Алматы облысындағы су қоймалары мен магистральдық каналдарды жаңғырту су ресурстарын тиімді басқаруға, суармалы жерлерді тұрақты сумен қамтамасыз етуге және гидротехникалық нысандардың қауіпсіздігін арттыруға мүмкіндік береді. Бұл ауыл шаруашылығының дамуына және өңірдің су қауіпсіздігін қамтамасыз етуге бағытталған маңызды инфрақұрылымдық жобалардың бірі.
